Memleket basshysy Nursultan Nazarbaev jýyrdaǵy Joldaýynda sońǵy jyldary «Nurly jol» baǵdarlamasy boıynsha respýblıkalyq mańyzy bar ınfraqurylym qalyptasqanyn, endi óńirlik jáne qalalyq ınfraqurylymdy júıeli túrde damytýdyń jón ekenin atap ótken bolatyn.
Jalpy, elimizdiń kólik-tranzıttik áleýetin nyǵaıtýda jáne halyqty jedeldikpen qamtamasyz etýde, ishki jáne syrtqy baılanystardy ornyqtyrýda áýe kóliginiń de mańyzdy ról atqaratyny belgili. Osy oraıda Qazaqstan arqyly ótetin avıatasymaldaý tranzıtiniń damýynda turaqty ósim bar ekenin aıta ketken lázim. Máselen, 2022 jylǵa qaraı, elimizdiń aýmaǵyn basyp ótetin ushýlardyń sany 2011 jylǵy deńgeımen salystyrǵanda keminde 1,5 esege artady dep kútilýde.
Álemdegi eń jas elordalardyń biri sanalatyn Astana Eýrazııanyń iri iskerlik, mádenı jáne ǵylymı habyna aınalyp keledi. Jahan ekonomıkasynda jyldan-jylǵa jedel órkendep kele jatqan sanatqa enetin Qazaqstannyń áleýmettik-ekonomıkalyq damý jaǵdaıy da elordanyń turǵyndary men qonaqtarynyń ósimine oń yqpal etip otyr.
Qazirgi Astana áýejaıynyń ótkizý múmkindigi 3,6 mln jolaýshyny quraıdy. Bul keleshekte jolaýshylar aǵynyndaǵy trafıktiń ósimine laıyqty jaýap bere alatyn áleýet. Osyǵan baılanysty elordanyń áýe qatynasyndaǵy tutynýshy suranysyn qamtamasyz etý jáne EKSPO-2017 halyqaralyq mamandandyrylǵan kórmesin ótkizýge daıyndyq maqsatynda «Nurly jol» memlekettik baǵdarlamasy aıasynda astanalyq áýejaıdyń jańa termınaly jobasy júzege asyrylǵan bolatyn.
2017 jyldyń 31 mamyrynda Memleket basshysynyń qatysýymen Astana qalasyndaǵy zamanaýı halyqaralyq termınal ashylǵany málim. Bul termınal halyqaralyq reısterdi qabyldaýǵa arnalyp salynǵan bolatyn.
Jańa termınaldyń jalpy aýdany halyqaralyq jolaýshylar jáne VIP termınalyn qosa alǵanda 47 myń sharshy metrdi quraıdy. Munda jolaýshylardy ushaqqa otyrǵyzý jolaǵymen birge áýe kemelerine arnalǵan 6 jańa turaq jáne 4 avtobýsqa arnalǵan shyǵý joldary bar. Halyqaralyq talaptarǵa saı jańa termınal aýmaǵynda zamanaýı qaýipsizdik júıesi ornatyldy. Sondaı-aq áýejaıdyń qyzmet kórsetý sapasyn arttyrý maqsatynda joǵary tehnologııaly júıeler engizildi. Termınalda elimizde alǵash ret júkti óńdeýdiń zamanaýı júıesi ornatyldy. Bul júıe Eýroodaq talaptaryna sáıkes keledi. Sonymen birge saǵatyna 1200 dana júkti ótkizý qabiletine ıe. Jeke kýálikti tekserýge arnalǵan 50 kabına jumys isteıdi. 27 tirkeý baǵany jáne 4 ózin ózi tirkeý baǵany qyzmet kórsetedi.
T1 termınalynyń jalpy ótkizý múmkindigi jylyna 5,2 mln jolaýshyny quraıdy.
Dýman ANASh,
«Egemen Qazaqstan»