Túrkııanyń Býrsa qalasynda elimizdegi aıtýly qylqalam sheberleriniń irgeli eńbekteriniń basyn biriktirgen «Uly dala rýhy» kórmesi ashyldy. Baýyrlas eldiń óner súıer qaýymyna usynylǵan kóshpeli kórme Mádenıet jáne sport mınıstrliginiń, sondaı-aq Á.Qasteev atyndaǵy Memlekettik óner mýzeıi men Halyqaralyq TÚRKSOI uıymynyń muryndyq bolýymen shymyldyǵyn túrip otyr.
«Uly dala rýhy» kórmesi kóshpendiler mádenıetiniń, qazaqtyń turmys dástúrin, ulttyq at sporty oıyndaryn, baı ádep-ǵuryptarynyń biregeı ereksheligin kórsetedi. Ol qazirgi zamanǵy túrkitildes elderdiń beıneleý ónerin, ótken tarıhyn, onyń aýmaǵynda bolǵan ejelgi órkenıetterdi, qazirgi zamanǵy adamzat problemalaryn rýhanı izdenister arqyly tanyp bilýge jeteleıdi.
Túrik kórermenderi otandyq Evgenıı Sıdorkın, Ábdirashıt Sydyhanov, Dýlat Álıev, Ǵanı Baıanov, Bahyt Bapıshev syndy óner sheberleriniń, sondaı-aq Marat Bekeev, Shamıl Gýlıev, Nellı Býbe, Asqar Esdáýlet, Almagúl Meńlibaeva, Andreı Noda, Gúljamal Tagenova, Alpysbaı Qazyǵulov jáne Vıacheslav Lıýı-Ko sııaqty zamanaýı sýretshilerdiń shyǵarmashylyǵymen tanysa alady. Kórme kolleksııasy 32 keskindemelik jáne grafıkalyq týyndyny qamtyǵan.
Mýzeı dırektory, professor Gúlmıra Shalabaeva atap ótkendeı: «Kórme Qazaqstannyń zamanaýı óneriniń keń stılıstıkalyq ártúrliligin, ulttyq boıaýy men ózindik ereksheligin aıqyn kórsete otyryp, kórneki túrde usynady. Á.Qasteev atyndaǵy óner mýzeıi sheteldik kórmelerdi ár túrli elderde uıymdastyrý arqyly, qazaq ónerin halyqaralyq deńgeıge kóterip, álem halyqtaryn tól mádenıetimiz, tarıhymyz ben beıneleý ónerimizdiń tereńine úńilýge shaqyrady».
Arman OKTIаBR,
«Egemen Qazaqstan»
ALMATY