Astanada Qoǵamdyq damý mınıstrligi Qoǵamdyq kelisim komıteti Din máseleleri jónindegi ǵylymı-zertteý jáne taldaý ortalyǵynyń uıymdastyrýymen «Qazaqstanda dintaný saraptamasyn júrgizýdiń ózekti máseleleri» atty dástúrli oqytý semınary ótti.
Sharaǵa Ádilet mınıstrligi Sot saraptamasy ortalyǵy, BǴM ǴK «Memleket tarıhy» memlekettik mekemesi, Almaty qalasy boıynsha sot saraptamasy ınstıtýty, L.N.Gýmılev atyndaǵy Eýrazııa ulttyq ýnıversıteti, «Kásibı psıhologııalyq lıga» qoǵamdyq birlestigi, «Saraptamalyq zertteý ortalyǵy» jeke mekemesiniń bilikti mamandary men belgili dintanýshy sarapshylar, sondaı-aq magıstranttar men doktoranttar qatysty.
Dintaný saraptamasymen aınalysatyn memlekettik organdar qyzmetkerlerine arnap uıymdastyrylǵan semınar atalǵan qyzmettegi mamandardyń kásibı biliktiligin arttyrý, dinı mazmundaǵy materıaldarǵa saraptama júrgizýdiń ózekti máseleleri men tıimdi ádis-tásilderin talqylaý, salalyq mamandardyń ózara tájirıbe almasý alańyn qalyptastyrýdy kózdeıdi.
Semınardy ashqan ortalyq dırektory Aınur Ábdirásilqyzy atalǵan mekemeniń atqarǵan jumystaryna qysqasha sholý jasady. Onyń pikirinshe, 2011 jyldan bastap saraptama júrgizýdi qolǵa alǵan ortalyqta búginge deıin 8528 nysan saraptamadan ótkizilgen, onyń 958-ine teris qorytyndy berilgen.
О́z kezeginde Qoǵamdyq kelisim komıteti Tóraǵasynyń orynbasary B.Myrzaev elimizdegi dintaný saraptamasyn júrgizýdiń kezeńdik nátıjelerine toqtalyp, bul taqyryptyń memleket qaýipsizdigi úshin mańyzy zor ekenin atap ótti. Komıtettegi osy baǵytta júzege asyrylyp jatqan jumystardyń biri retinde áleýmettik jelilerdegi, atap aıtqanda, 2016 jyly 10700, byltyr 10174, bıyl 3790 nysanǵa saraptama jasalǵanyn aıtty.
Al ekstremıstik jáne dástúrli emes materıaldarǵa dintaný saraptamasyn júrgizýdiń mazmundyq máseleleri týraly taqyrypty tarqatqan A.Ábdirásilqyzynyń málimeti boıynsha, 2013-2018 jyldar aralyǵynda saraptamadan ótkizilgen dástúrli emes dinı aǵymdaǵy nysandar sany 236-ǵa jetken, onyń ishinde 111 dana kitap, 27 SD dısk, 13 dápter, 11 vıdeo, 8 saıt jáne basqa da áleýmettik jeli paraqshalary, skrınshottar men túrli zattar bar. Saraptama jasaý kezinde Ata zań, «Ulttyq qaýipsizdik týraly», «Dinı qyzmet jáne dinı birlestikter týraly», «Buqaralyq aqparat quraldary týraly» zańdar basshylyqqa alynatynyn, sondaı-aq ulttyń tarıhı-mádenı murasynan aıyrylý qaýpi – ulttyq qaýipsizdikke nuqsan keltiretin jaǵdaılardyń biri ekenin sóz etti.
Semınar barysynda atalǵan ortalyqtaǵy Dintaný saraptamasy bazasyna, teris qorytyndy berilgen materıaldarǵa qatysty baıandamalar jasaldy.
Aıdana ShOTBAIQYZY,
«Egemen Qazaqstan»