Oblys ákimi Bolat Baqaýov «Data ortalyq» ashýǵa nıetti Kambodja elinen kelgen ınvestorlarmen júzdesti.
Kambodjalyq «Murager hanzada» kompanııasy álemdegi alpaýyt bıznes qurylymdardyń biri sanalady. Bizdiń elimizde bul kompanııa «AqMol» kásipornymen seriktestik jumys jasaýda. Jańa tehnologııalar salasynda álemdik deńgeıde belgili «Murager hanzada» Qytaı, Laos sııaqty memleketterde aqparattardy saqtap, óńdeýge múmkindik beretin 40-tan astam «Data ortalyq» salǵan.
Bul jobalarǵa 1,2 mlrd. AQSh dollary kóleminde ınvestısııa quıǵan. Kompanııa ókilderiniń tańdaýy elektr energııasyna baı Ekibastuzǵa túsipti. Al, «Data ortalyqtyń» jumysyna 1 myń MegaVatt kóleminde energııa qajet kórinedi. Ekibastuzǵa qazir mol energııany taratýǵa múmkindik beretin ınfraqurylym kerek.
Bolat Baqaýov bundaı úlken bıznes, jaqsy maqsat úshin jan-jaqty qoldaý kórsetýge ázir ekenin jetkizdi. Al, kambodjalyq kásipkerler tarapynan bul maqsat úshin ınvestısııa quıý týraly sheshim qabyldansa, jobanyń júzege asyrylýyn oblystyq ákimdik barynsha qoldaıdy.
Kezdesý sońynda kompanııa ókilderi jobany jan-jaqty saralap, tıisti sheshim qabyldaıtyndaryn jetkizdi.
Farıda BYQAI,
«Egemen Qazaqstan»
PAVLODAR