Táýelsizdik kúni qarsańynda oblys ákimi Danıal Ahmetov óńirdiń ár saladaǵy birqatar azamattaryna memlekettik nagradalardy tabys etti.
Sonyń ishinde biz bir adamdy bóle-jara ataǵan bolar edik. Ol – Altaı aýdany ákiminiń orynbasary Janna Asqarova. Ol kisi týraly gazetimizde «Turǵyndardy qutqaram dep júrip ózi sýǵa ketip qala jazdady» dep jazǵan edik. Rasynda, bıylǵy kóktemde, naqtyraq aıtsaq, 31 naýryzdan 1 sáýirge qaraǵan túni Zyrıan aýdany ákimdigi qyzmetkerleri sý basqan Maleev aýylynyń turǵyndaryn qaýipsiz jerge kóshirýge kelgen kezde ózderi de sýǵa aǵyp kete jazdap, bir ajaldan aman qalǵan bolatyn. «Nıva» kóliginiń ishinde J.Asqarovamen birge Maleev aýyldyq okrýgi ákimdiginiń bas mamany Natalıa Zaıseva, mektep dırektory Aıgúl Bashaeva men júrgizýshi Aleksandr Habarov bolǵan edi. «Kólikti qap-qara tasqyn shyr aınaldyryp áketti. Aınala tastaı qarańǵy, sýdyń gúrilinen basqa eshteńe estilmeıdi. Áýelde kómekke shaqyryp aıǵaılap kórip edik, nátıje shyqpady. Bir kezde kólikke sý kire bastady. Aıaqtan órlegen sý keýdege jetkende, ómirden kúder úzip, otbasymyzǵa habarlasa bastadyq. Úı-ishimizben qoshtasyp jatqanda basqa kóliktiń jaryǵy kózge shalyndy. Bizdi izdep júrgen shyǵar degen úmitpen telefonnyń shamyn jaǵyp, belgi berýge tyrystyq. Sol áreketimizden nátıje shyǵyp, izdeýshiler bizdi taýyp aldy. Talǵat esimdi jigit kóliktiń terezesin teýip syndyryp, bizdi kezekpen syrtqa shyǵardy. Olardyń isi naǵyz erlik edi. О́z bastaryn táýekelge tigip, bizdi qutqardy», - degen edi sol kezde aýdan ákiminiń orynbasary.
Táýelsizdik merekesi qarsańynda oblys ákimi D.Ahmetov turǵyndar úshin ómirin qaterge tikken aýdan ákiminiń orynbasaryna «Qurmet» ordenin tapsyrdy.
Azamat QASYM,
«Egemen Qazaqstan»
О́SKEMEN