QR Mádenıet jáne sport mınıstrliginiń qoldaýymen Ulttyq kitaphanada ótken eske alý keshinde elimizge belgili qalamgerler asa kórnekti ádebıet synshysy jazýshy, dramatýrg Asqar Súleımenovtyń týǵanyna 80 jyl tolýyn atap ótip, qalamgerdiń óz shyǵarmalary, ultyna degen zor súıispenshiligi arqyly qalyń oqyrmannyń júrgende qalǵan ultjandy kelbeti týraly saǵynyshqa toly estelikter aıtyldy.
Ulttyq kitaphana dırektorynyń orynbasary Baqytjamal Ospanova búginde rýhanııat ordasynyń derekqorynda Asqar Súleımenovtyń 300-den astam kitaptary saqtalǵandyǵyn ári osynaý qundy kitaptardyń jastar arasynda zor suranysqa ıe ekendigin jetkizdi.
Eske alý keshin júrgizgen jazýshy, pýblısıst Beıbit Qoıshybaev asa kórnekti jazýshy, oıshyl, dramatýrg Asqar Súleımenovtiń ádebıetke 60-jyldary kelýi erkindik ańsaǵan, jańalyqqa qumar jastardyń ádebıetke jańasha qaraýǵa kirisken kezeńimen tuspa-tus kelgenin jetkizdi. «Ol kezde joǵary oqý orynyn da aspırantýrany da tamamdap úlgerip, syndy ótkir jazatyndyǵymen kózge tústi. Sonaý Sozaqtan shyǵyp orys tilin erkin meńgergendigimen, ótkir oılar, pikirlerimen zııaly qaýymdy eleń etkizgen edi. Al sol kezde «Túr týraly birer sóz» atty maqalasy da birden ádebı ortanyń nazaryn aýdardy» dep atap ótti. Al akademık О́mirzaq Aıtbaıuly sonaý bir alǵash kezeńdegi erekshe bir dostyqtyń kýási bolǵan jyldardy esine aldy. «Bizderdi tabystyrǵan dombyra edi. Qazaqtyń qara dombyrasyna, kúılerine osynshama ǵashyq bolǵan jandy men kórgen emespin. Tún tereńinde telefon shalyp «Saǵyndym... Qosbasarmen Tesmirtasty tyńdaǵym keledi deıtin. Osylaısha bizder tań bozyna deıin qazaqtyń kúı men jyryn tyńdaýshy edik», dedi ǵalym.
Asqar Súleımenovtyń adamı bolmysy, ádebıettegi aıshyqty orny týraly Murat Áýezov, Smaǵul Elýbaev, Zákir Asabaev, Mámbet Qoıgeldi, Núketaı myshbaeva, Dosqan Joljaqsynov, Dıdar Amanttaı, Álııa Bópejanova, t.b. ǵalymdar men qalamgerler, óner qaıratkerleri erekshe tolǵanysty estelikter aıtyp, qalam terbeýdegi sony erekshelikterine toqtalsa, jazýshynyń qyzy Qarashash Asqarqyzy osynaý ádebı ortada óskendigi men ákege degen saǵynyshyn jetkizip, qalyń eli qazaǵynyń Asqardaı alyp tulǵany osylaı dáriptep, eske alyp otyrǵandyǵyna zor alǵysyn bildirdi.
Elvıra SERIKQYZY,
«Egemen Qazaqstan»
ALMATY