Qostanaıda júkti kelinshekterdiń sulýlyq baıqaýy byltyrdan beri dástúrge aınaldy. Bıyl oǵan bes kandıdat qatysty. Kelinshekter mundaı baıqaýǵa qatysýǵa ózderiniń densaýlyǵyn baqylaıtyn dárigeriniń ruqsatymen keldi. Zaldaǵy kórermender arasynda kezekshi dárigerler otyrdy.
«Mundaı baıqaýlardyń uıymdastyrylýy durys dep bilemiz. Tek baıqaýǵa qatysqan arýlarǵa tolqymaý kerek dep keńes berer edik. О́ıtkeni keıde tym qatty qýanǵannyń ózi densaýlyqqa keri áser etedi, qýanysh, jaqsy kóńil-kúı árdaıym paıdaly bolýy tıis» deıdi Salamatty ómir salty ortalyǵynyń bólim meńgerýshisi Gúlsim Sadaqbaeva.
Záýresh Álibekova qazir dekrettik demalysta. Ol qaladaǵy № 25 mektepte psıholog bolyp qyzmet etken. Olar joldasy ekeýi tuńǵyshyna daıyndalyp júr, uldy dúnıege ákelsem eken dep armandaıdy.
«Men baıqaýǵa qatysýǵa usynys bolǵanda birden kelistim. Biz munda jeńis nemese básekelesý úshin kelgen joqpyz, osy bir tartymdy sátterdi keıin eske alyp, sábılerimizge aıtyp berý úshin keldik», deıdi Záýresh.
Baıqaý ózin tanystyrý, shyǵarmashylyq, qyzyqty oqıǵa, otbasynyń súıikti tamaǵy jáne defıle sııaqty bes bólimnen turdy. Kelinshekter óz ónerin, ıkemdilikterin kórsete bildi. Bul sharada kelinshekterdiń barlyǵy da jeńimpaz boldy. Olar ózderine de, ózgege de tek qýanysh, jarasymdy kóńil-kúı syılady.
Názıra JÁRIMBET,
«Egemen Qazaqstan»
Qostanaı