Býrabaı shıpajaıyna tynyǵýǵa keletin týrıster endi kýrortty aımaqtyń resmı sýyn tutyna alady. Emdik qasıeti bar sýsyndy «Kókshetaý mıneraldy sýlary» kásiporny usynyp otyr. Jaqynda óndiris oshaǵy «QULAGER BURABAY» dep atalatyn sýdyń jelisin iske qosty. Kásiporyn men oblystyq týrıstik operatorlar qaýymdastyǵy arasynda kelisim jasaldy. Endi Býrabaı ólkesiniń resmı sýy týrıstik nysandardyń barlyǵyna jetkiziletin bolady.
Kásiporyn ujymy Býrabaı shıpajaıynyń resmı sýyn óndiriske qosýdy kópten beri josparlap kelgen bolatyn. Sáti túsip joba osy jyly júzege asyp otyr. Aıta ketsek, sýdyń emdik qasıetteri mol. Quramy Germanııa men Ýkraınanyń jetekshi ınstıtýttarynda zerttelgen. Shıpajaıdyń resmı sýynda mıneraldy zattyń 16 túri bar. Ol júrek-qan tamyrlary, as qorytý, teri aýrýlaryna em. Keler jyldan bastap kýrortty aımaqtaǵy barlyq týrıstik nysanda «QULAGER BURABAY» sýsynymen emdeý sharalary júrgizilmek.
Bir aıta keterligi, Býrabaı ólkesiniń sýy tek kýrortty aımaqqa ǵana emes, oblystyń barlyq týrıstik nysandaryna da tasymaldanbaq. Kásiporyn men oblystyq týrıstik operatorlar qaýymdastyǵynyń arasynda memorandýmǵa qol qoıyldy. Sonymen qatar, emdik qasıeti bar sýsynnyń Qazaqstan men alys-jaqyn shet el azamattaryna qol jetimdi bolý úshin de múmkindikter jasalady. Osylaısha taraptar elimizdegi medısınalyq týrızmdi damytýdy kózdep otyr.
Baıqal BAIÁDIL,
«Egemen Qazaqstan»