Elbasynyń BAQ ókilderine bergen suqbaty barysynda «Egemen Qazaqstan» RG» AQ Basqarma tóraǵasy Darhan Qydyráli Túrkistan qalasynyń mártbesi týraly suraq qoıdy.
- Esimizde 2010 jyly Túrkııanyń sol kezdegi Prezıdenti Abdýlla Gúl myrza Túrkistanda ózińizge asataıaq ustatyp, «Túrki áleminiń lıderi» dep ataǵan bolatyn. Bıyl sonyń jarqyn aıǵaǵy ispetti túgel dúnıeniń tóri sanalatyn Túrkistanǵa aıyryqsha mártebe beretin jarlyqqa qol qoıdyńyz. Ol tek Qazaqstan halqyna emes, baýyrlas jurttardy da úlken qýanyshqa bóledi. Endi Túrkistan oblys ortalyǵy mártebesin aldy, Shymkent megapolıs atandy. Bul elimizge úlken serpilis beretin bastama. Osy tarıhı sheshimniń negizgi sebepterine toqtalsańyz.
- «Túrkistan bizdiń tarıhı ortalyǵymyzdyń bireýi. Qazaqta ortalyq kóp bolǵan ǵoı. Ol jerde óte úlken sheshimder qabyldanǵan. Qazirdiń ózinde Túrkistannyń túbinde, keseneniń tóńireginde birneshe handarymyzdyń, belgili batyrlarymyzdyń súıegi jatyr. Túrki dúnıesiniń rýhanı ortalyǵy bolyp sanalady. Qoja Ahmet Iаssaýıdiń ilimin qasterleıtin jurt kóp. Byltyrdyń ózinde 150 myńǵa jýyq týrıster kelip ketti», dedi Prezıdent.
Sondaı aq Elbasy suhbat barysynda mıllıon turǵyny bar qalalardy kóbeıtý jaıyn talqylady.
«Shymkenttiń halqy mıllıon bolǵannan keıin biz ony tikeleı ortalyqqa baǵynatyn qala dep aldyq ta, oblystyń ortalyǵyn Túrkistan qalasyna alyp keldik. Ol jerde tez arada taǵy bir úlken qala paıda bolady. Bizge qalalardy kóbeıtý kerek. Bizge mıllıon turǵyny bar qalalar kerek. Álem boıynsha mıllıon halqy bar qalalarda ǵylym-bilim, mádenıet tez damıdy. Táýelsizdik jaǵdaıynda qazir úsh qalamyz bar. Endigi mańyzdy qala – Aqtóbe nemese Qaraǵandy bolsa degen oıym bar. Aýyldan qalaǵa halyq kóship jatyr, ýrbanızasııa prosesi júrip jatyr. AQSh halqynyń 2%-y aýylda turady. Al bizde aýyl halqy 43%-dy quraıdy. El úshin de, saıasat úshin de úlken másele dep sanaımyn. Túrkistandy kótersek, az jyldyń ishinde úsh júz myń adamy bar qala bolyp shyǵady. Qurylysyn bekittim. Departamentter, úı jáne mádenıet qurylysy, tarıhı máni bolǵannan keıin birneshe mýzeı qurý jospary bar. Týrısterdi tartyp, úlken qala bolsa degen arman bar. Jylyny jaqsy kóretinder sonda barsyn, sergek bolam dese osynda kelsin», dedi Elbasy.