Búgin Almatydaǵy Pedıatrııa jáne balalar hırýrgııasy ǵylymı ortalyǵy «Qazaqstan Respýblıkasyndaǵy pedıatrııalyq qyzmettiń sońǵy 10 jyldaǵy jetistigi» taqyrybynda baspasóz brıfıngin ótkizip, tómendegideı málimetterdi jarııalady.
Ana men bala densaýlyǵyn qorǵaý boıynsha basymdyq berilgen strategııalyq sharalar 2016–2020 jyldarǵa arnalǵan QR densaýlyq saqtaý salasyn damytýdyń «Densaýlyq» memlekettik baǵdarlamasyn iske asyrý arqyly óz sheshimin taýyp, sońǵy jyldary balalar men nárestelerdiń ólim-jitimi kórsetkishiniń tómendeýine múmkindik berdi. Sońǵy 10 jylda balalar ólim-jitiminiń kórsetkishi 2 esege (2017 jyly 1000 nárestege shaqqanda 10,2) jáne náresteler ólim-jitiminiń 2,6 esege (2017 jyly 1000 nárestege shaqqanda 7,9) tómendedi.
Pedıatrııa jáne balalar hırýrgııasy ǵylymı ortalyǵynyń Basqarma tóraıymynyń mindetin atqarýshy Janar Saýranbaevanyń aıtýynsha, QR densaýlyq saqtaý salasyn damytýdyń 2016-2019 jyldarǵa arnalǵan «Densaýlyq» memlekettik baǵdarlamasynyń aıasynda Qazaqstan Respýblıkasynda bosandyrý men balalyq shaq qyzmetiniń tıimdiligin arttyrý boıynsha biriktirilgen úlgini engizý jónindegi Jol kartasy júzege asyrylýda. «Balalar densaýlyǵyn qorǵaý densaýlyq saqtaý salasynyń, memleket pen qoǵamnyń eń ózekti jáne eń mańyzdy máseleleriniń biri. Sebebi, balalardyń deniniń saýlyǵy eresekter densaýlyǵynyń áleýetin qalyptastyrýdyń irgeli negizin quraıdy. Elimiz Dúnıejúzilik densaýlyq saqtaý uıymynyń ana men balanyń birge bolýy, tek qana emizý, kúni jetip týǵan jáne eresek balalardy baǵyp kútýge jiberýge arnalǵan «Qaýipsiz ana» strategııasyn qabyldady. Qazaqstanda Ortalyq Azııadaǵy Táýelsiz Memleketter Dostastyǵy elderimen salystyrǵanda bir jasqa deıingi balalar ólimi (7,9‰) náresteler ólimi kórsetkishi deńgeıinen 1,2 esege tómen (TMD boıynsha – 9,3‰: Qyrǵyzstan – 19,9‰; Tájikstan – 11,8‰, О́zbekstan – 10,7‰; Ázirbaıjan – 9,8‰; Reseı – 7,3‰). QR DSM-niń janynan Balalarǵa medısınalyq kómek kórsetýdiń biriktirilgen úlgisin engizý boıynsha Úılestirý keńesi jumys isteıdi. О́ńirlerdegi balalarǵa medısınalyq kómek kórsetý isine monıtorıng jasaı otyryp, ana men bala ólimin tómendetý boıynsha shuǵyl sharalar qabyldaý jónindegi Respýblıkalyq shtab uıymdastyryldy, kóshpeli otyrystar ótkizildi.
2018 jyly basqarýshylyq sheshimder qabyldanǵan Respýblıkalyq shtabtyń 13 otyrysy ótti. Elimizde pedıatrııalyq kómek kórsetýdi uıymdastyrý standarty engizildi», dedi Janar Saýranbaeva.
Brıfıngte pedıatrııalyq qyzmettiń sońǵy 10 jyldaǵy jetistigi atap ótildi.
Aınash ESALI,
«Egemen Qazaqstan».
ALMATY