Memleket basshysy óz bastamalarynda damyǵan aqparattyq tehnologııalar – sanaly, saýatty urpaq tárbıeleýge jol ashatynyn basa aıtyp, bul iske aıryqsha mán berip keledi. Bul rette «Sıfrly Qazaqstan» baǵdarlamasy aıasynda qolǵa alynǵan jobalardyń jóni bólek. Sonyń nátıjesinde bilim berý keńistigi qarqyndy ósip, sandyq ortanyń damýy mol múmkindikterge jol ashyp otyr.
Búginde mektepterdi keń jolaqty ınternetke qosý jáne beıne quraldarmen jabdyqtaý, sondaı-aq sıfrlyq bilim berý resýrstaryn damytý máseleleriniń mańyzy zor. Sońǵy jyldary bul baǵyt boıynsha edáýir ilgerileý baıqalady. Elimizdegi mektepterdiń basym bóligi keńjolaqty ınternetke qosylyp, mektepter men mektepten tys uıymdarda iske qosylǵan robototehnıka jáne 3D modeldeý úıirmeleriniń sany artqan.
Bul rette bilim oshaqtarynda jappaı qoldanysqa engen «Kundelik.kz» elektrondy kúndelik jáne jýrnaldar júıesin aıryqsha ataýǵa bolady. Atalǵan júıe muǵalimderge elektrondy formatta jýrnal toltyrýǵa múmkindik týdyrsa, ata-analar qaýymy úshin balasynyń úlgerimin qashyqtyqtan-aq qadaǵalaýǵa jol ashqan. Mamandar júıe jumysyn bastaǵaly beri oqýshylardyń úlgerim sapasy men tártibinde oń ózgerister baıqalǵanyn aıtady.
Naqtyraq aıtsaq, elektrondy jýrnaldar men kúndelikter júıesi el aýmaǵy boıynsha 6 myńnan astam mektepte iske qosylypty. Búgingi tańda júıege 300 myńǵa jýyq muǵalim men 2,5 mln astam oqýshy jáne 1,5 mln astam ata-ana tirkelip úlgergen. Júıeniń arnaıy mobıldi nusqasy da ázirlengen.
Bul rette basa aıtatyn máseleniń biri, ásirese, shalǵaı aýyldardaǵy shaǵyn mektepter aıryqsha nazar aýdarýdy qajet etedi. Búgingideı jappaı damý kezeńinde ol bilim oshaqtary da qala mektepterinen esh kem bolmaýy kerek. Sońǵy ýaqyttary óńirlerdegi mektepterdi «Bilim book» tárizdi elektrondy kompıýter-planshettermen, sońǵy úlgidegi jańa tehnologııalarmen jabdyqtaý isi de qarqyn ala bastaǵandaı.
Málimetterge sáıkes, elimizde ótken jyly sıfrly bilim berý resýrstary boıynsha 2 myń jańa sabaq pen 50 myń jańa test synaǵy ázirlenipti. Arnaıy ótkizilgen 697 trenıng pen 126 onlaın konferensııaǵa qatysqan 15 myńnan astam muǵalim kásibı biliktiligin jetildirgen. Oǵan qosa 500-ge jýyq mektep «Bilim book» qanatqaqty bilim berý júıesimen qamtylǵan. Astana, Almaty, Shymkent, Taldyqorǵan, Oral qalalarynda mektep muǵalimderin aqparattyq tehnologııalardy meńgerýge beıimdeıtin bes birdeı ortalyq ashylǵan.
– Qazaqstannyń barlyq mektepteri bizdiń portaldarǵa qosylǵan. Júıemizde qazaq, orys, aǵylshyn tilderinde 40 myńnan astam ınteraktıvti sıfrlyq sabaq bar. Ár sabaqtyń ishinde qysqasha túsindirme mátinder, arnaıy beınematerıaldar, ınteraktıvti tapsyrmalar, qysqasha testileý synaqtary qamtylǵan. Elimizdegi ulttyq biryńǵaı testileý eki satyǵa bólingendikten Itest.kz jobamyzdy soǵan yńǵaılandyryp otyrmyz. Onda 60 myńǵa jýyq suraq bar. Bul túlekter úshin úlken kómek. Resýrsymyzǵa kúnine shamamen 50 myńǵa jýyq adam kiredi. Brıtandyq kompanııamen birlese jasaǵan Tvit.bilim dep atalǵan jobamyzdy mamandar joǵary baǵalady. Munda kóbine-kóp jaratylystaný pánderi boıynsha úzdik beınesabaqtar engizilgen. Byltyrdan bastap naryqqa shyǵarylǵan «Bilim book» kompıýter planshetimiz úlken suranysqa ıe bolyp otyr. Onyń ishinen kerektiniń bárin tabýǵa bolady. Qurylǵynyń basty ereksheligi ınternetsiz de jumys isteı beredi. О́tken jyly 3 myńnan asa planshet satyldy, – deıdi «Bilim Media Group» kompanııasynyń atqarýshy dırektory Sanjar Kenjehanuly.
Sońǵy ýaqyttary bilim júıesin sıfrlandyrýǵa baǵyttalǵan qanatqaqty jobalar óz tıimdiligin kórsete bastaǵan. Aıtýly tehnologııa óndirýshi kompanııalarmen birlese otyryp qolǵa alynǵan mundaı jańashyldyqtar bilim salasyn sandyq formatta jetildirýdiń aýqymyn barynsha keńeıtip keledi.
Arman OKTIаBR,
«Egemen Qazaqstan»
ALMATY