Bıyl áıelder arasynda Astanada ótetin tennısten Federasııa kýbogy jolyndaǵy jarysta Qazaqstan namysyn kimder qorǵaıtyny belgili boldy.
Mańyzy zor jarysta Qazaqstannyń týy astynda Iýlııa Pýtınseva, Zarına Dıas, Anna Danılına jáne Gozal Aınıtdınova óner kórsetedi. Alǵashqy ekeýiniń esimi kópshilikke jaqsy tanys. Bul kúnderi WTA reıtınginde 24 jastaǵy Iýlııa 39 orynda tursa, 25 jastaǵy Zarına 95 satyǵa jaıǵasty. Ekeýi de birqatar iri halyqaralyq týrnırde aıtarlyqtaı tabystarǵa qol jetkizip júr.
Astanadaǵy týrnırde Qazaqstan «A» tobynda óner kórsetedi. Qarsylastarymyz – Taıland pen Úndistan quramalary. «V» tobynda Ońtústik Koreıa, Qytaı, Indonezııa jáne Muhıt jaǵalaýy tennısshileri kúsh synasady. Osy qos toptan ozǵan bir ǵana komanda álemdik toptyń ekinshi kezeńine joldama alady.
Ǵalym SÚLEIMEN,
«Egemen Qazaqstan»