О́ńirde júıeli túrde sportpen aınalysatyn adamdardyń sany boıynsha respýblıka kóleminde 4-shi orynda tur. Ońtústik Koreıada ótken Olımpıadaǵa 7 jerlesimiz qatysyp, 3 short-trekshi besinshi oryn aldy. Mamandandyrylǵan olımpıadalyq rezerv kolledji jattyqtyrýshylardy daıyndaýda. Stýdentterge álem chempıondarynyń sabaq berýi josparlanǵan.
Bul kúnderi oblys boıynsha 228 myńǵa jýyq adam buqaralyq sportpen shuǵyldanady. Oblystyq dene tárbıesi jáne sport basqarmasynyń málimetinshe, ótken jylǵy sporttyq sharalarǵa 160 myńnan astam adam qatysqan. Mektepter men kolledjderdegi, joǵary oqý oryndaryndaǵy sport zaldardy sabaqtan tys ýaqytta kópshiliktiń de paıdalanýyna ruqsat. Oblys kóleminde 202 fýtbol alańy jumys isteıdi. Olardyń 10-y tolyq ólshemdi alańdar bolsa, 192-si jasandy jamylǵyly shaǵyn fýtbol alańdary.
Bul kúnderi aldaǵy 5 jylǵa buqaralyq sportty damytýdyń strategııasy ázirlendi. Oblys ákimdigi «Qazaqstandyq STREET WORKOUT federasııasyna», «Samuryq-Qazyna» aksıonerlik qoǵamy men «ERG» kompanııasyna kópfýnsıonaldyq sporttyq alańdar salýǵa demeýshilik kórsetkenderi úshin alǵys bildiredi.
Mysaly, «ERG» kompanııasynyń demeýshiligimen óńirde 62 kópfýnsıonaldy alań iske qosylǵan. «Samuryq-Qazyna» AQ 14 sporttyq nysandy paıdalanýǵa bergen. Baıanaýyldaǵy Myrzashoqy taý-shańǵy bazasynyń qurylysyna ERG korporasııasy 300 mıllıon teńge bólgen. Basqarmanyń málimetinshe, oblys ortalyǵynda memlekettik-jekemenshik áriptestik sheńberinde jabyq jeńil atletıka maneji, jabyq fýtbol maneji, olımpıadalyq rezerv daıarlaý ortalyǵy, eskek esýge arnalǵan arnaıy oryn men Ýsolka ózeni arnasynda trıatlon men bıatlon saıabaǵyn ashý jobasy ázirlenýde.
Byltyr túrli menshik formasyndaǵy 115 sporttyq ǵımarat paıdalanýǵa berildi. Aqsý qalasy aýyldyq aýmaǵyna qarasty Qyzyljar aýylyndaǵy dene shynyqtyrý-saýyqtyrý kesheniniń qurylysy aıaqtaldy. Búginde Jelezın aýdany men Pavlodarskoe aýylynda deneshynyqtyrý-saýyqtyrý kesheniniń qurylysy júrgizilýde.
Kóshe sportyn damytýda oblys ortalyǵynda birqatar Street Workout alańdary ashylǵan edi. Aldaǵy ýaqytta bul jumys jalǵasady. Oblys ortalyǵyndaǵy 50 sport alańyn kútip, baqylaý jumysy «Ertis» sport klýbyna júktelgen. Jańadan ashylatyn sport nysandary páter ıeleri kooperatıv-teriniń quzyryna beriledi. Jalpy, oblysta ashyq aspan astyndaǵy sport alańdarynan bólek, 37 aýla klýby jumys isteıdi. Mundaǵy úıirmeler tegin júrgiziledi.
Basqarmanyń málimetinshe, S.Toraıǵyrov atyndaǵy memlekettik ýnıversıteti men memlekettik pedagogıkalyq ýnıversıteti dene shynyqtyrý páni muǵalimderin daıarlaıdy.
Farıda BYQAI,
«Egemen Qazaqstan»
PAVLODAR
Sýretti túsirgen Valerıı Býgaev