Memleket basshysynyń tóraǵalyǵymen Úkimettiń keńeıtilgen quramdaǵy otyrysy bastaldy. Jıyn barysynda 2018 jyldyń áleýmettik-ekonomıkalyq damý qorytyndysy shyǵarylady.
«Búgingi jıynda ótken jyldyń qorytyndysyn shyǵaramyz. Byltyr istelgen jumystar osy jerdegi bárimizdiń atqarǵan sharýamyzdyń nátıjesi. Barlyq ákimdikterdiń, mınıstrlikterdiń, jalpy memleket qyzmetkerleriniń istegen jumysy, onyń ishinde men de barmyn. Jalpy, 2018 jyldyń kórsetkishteri ekonomıkanyń barlyq salasynda jaqsy dep aıtýǵa bolady. Sonyń arqasynda halyqqa áleýmettik qyzmet kórsetetin múmkindik boldy. Atap aıtsaq, ekonomıkanyń ósimi 4 paıyzdan asty. Bul jalpy dúnıejúzilik ortasha ósimnen joǵary deýge ábden bolady. Negizinen saýdada 7,6, kólikte 4,5, ónerkásipte 4 paıyzdan astam ósim bar», - dedi Nursultan Nazarbaev.
Budan soń, Memleket basshysy el ekonomıkasynyń basqa da salalaryna toqtalyp ótti.
«Inflıasııanyń ótken jylǵy kórsetkishi 5,3 paıyzdy qurady. Solaı dep josparlanǵan edi. Negizgi kapıtalǵa salynǵan ınvestısııalar 17 paıyzdan asty. Bul da jaqsy kórsetkish dep aıtýǵa bolady. Atalǵan ekonomıkalyq kórsetkishterdiń barlyǵy halyq turmysyn jaqsartyp, naqty tabysynyń artýyna óziniń úlesin tıgizedi», - dedi Elbasy.
Sondaı-aq Memleket basshysy keshe 5 oblys ákimimen kezdeskenin eske salyp ótti.
«Oblys ákimderiniń esepterin tyńdadyq. О́ńirlerde de istelip jatqan sharýa az emes. Barlyǵy bizdiń baǵdarlamalardy oryndaý úshin atsalysyp, jumys istep jatyr», - dedi Elbasy.