Jaqynda Tarbaǵataı aýdanyna jasaǵan jumys saparymyzda kúre joldyń boıyndaǵy Táýke aýylyna jolymyz túsken edi. Elýge jýyq úıi bar eldi mekenge eki jyl buryn aýyz sý pavılıony ornatylypty.
Turǵyndar aýyldyń shet jaǵyna ornatylǵan sý pavılıonynan kúnine eki márte sý alyp turady eken. Eldi mekendegi ár úıde ekiden qudyq bolǵanymen sý pavılıonynyń sýy tereńnen (42 metr) shyǵatyndyǵymen erekshelenedi. «Úıde ornatylǵan qudyqtardyń sýy 6-7 metrden shyǵady. Al 42 metrden shyǵatyn artezıan sýynyń tazalyǵyna eshkim kúmán keltirmeıdi dep oılaımyn. Halyqtyń kóbi osyny túsine bermeıdi», - deıdi Táýke aýylyndaǵy sý pavılonynyń qyzmetkeri Kánsebek Jamanbaev.
Aýyz sý qurylǵysynyń ornatylǵanyna aýyl turǵyndary rızashylyǵyn bildirgenimen, aýyz sý ár úıge jetkizilse degen tilegin de jasyrmady. «Taza sý -densaýlyq kepili. Shaǵyn aýyldardy osylaı aýyz sýmen qamtyp jatqanyna razymyz. Desek te, taza sý árbir úıge jetkizilse jaqsy bolar edi. О́ıtkeni, bul aýyldyń turǵyndarynyń kópshiligi - qarttar. Balalary men nemereleri qalada. Shal-shaýqanǵa úıge kirgizip berse myń da bir rahmet aıtar edik», - deıdi aýyl turǵyny Jeńishan Tileýbaldın aqsaqal.
Tarbaǵataı aýdanynda búginde halyqtyń ortalyq aýyz sýmen qamtylýy 82,9 prosentti qurap otyrsa, eldi mekenderdiń ortalyq aýyz sýmen qamtylýy 56,7 prosentke jetip otyr. 2015 jyly halyqtyń ortalyq aýyz sýmen qamtylýy 66,6, eldi mekenderdiń ortalyq aýyz sýmen qamtylýy nebary 28 prosent bolypty. 2015 jyly aýdandaǵy 41 863 turǵynnyń 27904-i sýmen qamtylsa, qazir bul kórsetkish 32 733-ke jetip jyǵylypty. Bes jyl buryn aýdandaǵy 60 eldi mekenniń tek 17-sinde aýyz sý bolsa, qazir 34 aýyl taza aýyz sý iship otyrǵan jaıy bar. Osy bes jylda sýbsıdııa kólemi de bes esege artypty (2015 - 21 mıllıon, 2018 - 87,6 mıllıon). «Úlken aýyldardyń barlyǵyna derlik aýyz sý jetkizildi. Aýyz sý jetkizilmegen 50 men 400-ge deıin turǵyny bar 26 (3380 turǵyn) aýyl qaldy. 2018 jyly Úshtóbe, Seriktes, Saryóleń aýyldary sýǵa qosyldy. 2019 jyly Qyzylkesik, Sátpaev, Qumkól, Mańyraq, Ekpin aýyldaryna sý qubyryn tartý jumystary júrgiziledi. Buǵan respýblıkalyq bıýjetten 3,1 mıllıard teńge qarjy bólindi. Kishkene aýyldarǵa aýyz sýdy úıine deıin jetkizbesek te, qubyr qazyp, sý shyǵaryp berip jatyrmyz», - deıdi Tarbaǵataı aýdanynyń ákimi Dildabek Orazbaev.
Azamat QASYM,
«Egemen Qazaqstan»
Shyǵys Qazaqstan oblysy,Tarbaǵataı aýdany