О́tken jyly Almaty oblysynda adam ólimi, jańa týǵan nárestelerdiń shetineýi, týberkýlezden qaıtys bolǵandar sany azaıdy.
Alaıda, ana ólimi men jol-kólik apatynan qaıtys bolǵandar sany kemimen otyr. Bul týraly oblys ákiminiń orynbasary Aqan Ábdýálıevtiń jetekshiligimen ótken «Densaýlyq» baǵdarlamasynyń júzege asyrylýyna qatysty keńeste aıtyldy.
Jıynda óńirdegi «Mindetti áleýmettik medısınalyq saqtandyrý qory» aıasynda júrgizilgen jumystardyń esebi tyńdaldy. Osy qordyń Almaty oblysy boıynsha fılıalynyń basshysy Sábıt Quralbektiń aıtýynsha, fılıal qyzmetkerleri ótken jyl boıyna 81 kezdesý ótkizip, 8072 adamǵa aqparattyq túsindirý jumystaryn júrgizgen.
- Sonymen qatar oblystyq ákimshilik, densaýlyq saqtaý basqarmasy, qoǵamdyq densaýlyq saqtaý departamenti jáne respýblıkalyq elektrondy densaýlyq saqtaý ortalyǵymen birlese otyryp, 5 aýdandy aralap, óńirlik keńester ótkizdik, – dedi Sábıt Quralbek.
Al oblystyq densaýlyq saqtaý basqarmasynyń basshysy Baýyrjan Ysqaqtyń aıtýynsha, keıbir aýdandardaǵy halyq sanynyń tyǵyz ornalasýynan turǵyndarǵa dárigerlik qyzmet kórsetýdiń sapasy kóterilmeı otyrǵan kórinedi. Mysalǵa, Eńbekshiqazaq aýdanynda 3104 adamǵa bir dárigerden keledi eken.
Sondaı-aq, aýyldardaǵy ınternet baılanysynyń tómendigi aýrýhanalardyń jumysyn sıfrlandyrýǵa kedergi keltirýde. Derek boıynsha, Aqsý aýdanyndaǵy 17 aýyldyq okrýgtiń segizinde ınternet baılanysy múldem joq.
Qalmahanbet MUQAMETQALI,
"Egemen Qazaqstan"
Almaty oblysy