Birjan sal aýdanynda shaǵyn jáne orta bıznes sýbektileriniń sany 900-den asty. Shamaman 3 myńǵa adam turaqty jumys oryndarymen qamtylyp otyr.
Birjan sal aýdanynda ótken jyly ónerkásiptik ónimderdi óndirý kóleminiń ındeksi 127 paıyzdy qurady. Mundaı nátıje «Semizbaı U», «О́rken-Atansor», «Kókshe Sement» kásiporyndaryndaǵy ýran, temir keni, sement óndirisiniń artýymen tikeleı baılanysty. Al, aýyl sharýashylyǵy salasyndaǵy óndirilgen ónim kólemi 19 mıllıard teńgeden asty. Ýaqyt talabyna saı, aýylsharýashylyǵyna sandyq tehnologııalardy engizý jumystary jalǵasýda. Aýdan ákimi Ermek Nuǵymanovtyń aıtýyna qaraǵanda, ótken jyly 4 mıllıard 297 mıllıon teńge ınvestısııa tartylǵan. Salyq jáne bıýdjetke túsetin mindetti tólemder túsimi – 108 prosentti qurap otyr.
–Aýdanda 15 aýyldyq okrýgi bar. 14 jarym myń halyq bar. Búgingi kúni aýdannyń ekonomıkasy turaqty. Aýyl sharýashylyǵy da, óndiris te damyp keledi. Byltyr aýdanda 20 mıllıard 500 mıllıon teńgeniń óndiristik ónimi óndirildi. Sońǵy on jyldyń kóleminde ındýstrıaldy baǵdarlama aıasynda iri jobalar júzege asty,– aýdan ákimi Ermek Nuǵymanov.
«Nátıjeli jumyspen qamtý jáne jappaı kásipkerlikti damytý» baǵdarlamasyna aýdan turǵyndary belsendi qatysýda. Birinshi baǵyty boıynsha 94 adam kásiptik bilimmen qamtylsa, ekinshi baǵyty boıynsha 110 adam «Bastaý Bıznes» jobasyna oqyp shyqqan. Sonymen birge, 39 adam 149 mıllıon teńge kóleminde shaǵyn nesıe alyp, jeke kásipterin ashty. Aýdan turǵyndary shaǵyn nesıeni kóbinese mal sharýashylyǵyn damytýǵa alýda. Sonyń esebinen aýdanda ózin-ózi jumyspen qamtyǵan turǵyndardyń sany kóbeıip, jumyssyzdyq deńgeıi tómendegen. Qazir aýdanda tirkelgen jumyssyzdar úlesi 1,9 prosentti quraıdy.
Baıqal BAIÁDIL,
«Egemen Qazaqstan»
Aqmola oblysy,
Birjan sal aýdany