Aqtóbe qalasynyń ákimdigi shahardyń 150 jyldyq mereıtoıyna oraı josparlanǵan merekelik is-sharalar men arnaıy jobalar týraly aqparattandyrýdy jalǵastyrýda. Josparǵa sáıkes, jyl boıy mádenı jáne áleýmettik sıpattaǵy 300-den astam is-shara ótkizilmek. Mereıtoılyq aksııalar men jobalar kún saıyn júzege asyrylatyn bolady.
Sondaı mańyzdy oqıǵalardyń biri retinde Aqtóbe qalasynda týǵan jáne qazirgi ýaqytta shet elderde turyp jatqan azamattardy baǵaly syılyqtar kútip turǵanyn aıtýǵa bolady. Olar úshin qala ákimdigi Aqtóbedegi ómirine baılanysty úzdik hattar men jazbalar baıqaýyn uıymdastyrady.
Bul shyǵarmashylyq báseke 2019 jyldyń qyrkúıegine deıin jalǵasady, sol kezde mereıtoǵa arnalǵan negizgi sharalar ótedi dep kútilýde. Qala ákimdigi shetelden kelgen barlyq otandasymyzdy múmkindiginshe óz týǵan jerine kelýge jáne mereıtoıǵa belsene atsalysýǵa shaqyrady.
"Qazirgi ýaqytta biz búkil álem boıynsha jerlesterimizdi izdestirýdemiz. Eger siz ózińizdiń týǵan qalańyzben baılanystyratyn oqıǵalardy, týǵan qalańyzdan jyraqtaǵannan keıingi ómirińizdiń qalaı órbip jatqanyn, qandaı jetistikterge jetip, bıikterdi baǵyndyrǵanyńyzdy aıtýǵa daıyn bolsańyz, bizge áleýmettik jeliler arqyly jazyńyz, Aqtóbe qalasy ákimdiginiń akimat@akt.gov.kz elektrondyq poshtasyna hat joldańyz nemese 8-7132-41-64-02 telefony boıynsha habarlasyńyz.
Qaladaǵy ómirińizge baılanysty eń qyzyqty oqıǵalardyń jarııalanymy úshin baǵaly syılyqtar men kádesyılar ázirlenýde. Jazyńyz, qońyraý shalyńyz, kelińiz, ózińiz týraly aıtyńyz! Hattarmen birge fotosýretter bolýy mindetti. Biz qýana-qýana keri baılanysqa shyǵamyz jáne biz úshin jerlesterimizben kezdesip, olardyń ómirleriniń búgingi kúni qalaı ótip jatqany týraly bilý – óte mańyzdy", dep atap ótti Aqtóbe qalasynyń Ákimi Ispanov Ilıas Saparbekuly.
Aıta keteıik, qazirgi tańda Aqtóbeniń 150 jyldyǵyna arnalǵan monýment turǵyzý jumystary bastalyp ketti. Sonymen qatar qala tarıhy týraly derekti fılm túsirýge ázirlik sharalary júrgizilýde, birqatar jańa áleýmettik nysandar men óndirister ashý josparlanǵan. Sondaı-aq, qala basshylyǵy halyqaralyq, respýblıkalyq jáne óńirlik mańyzy bar kóptegen konkýrstar, festıvaldar men konsertter ótkizbek. Mereıtoı barysynda qazaqstandyqtar álemge tanymal ánshi Dımash Qudaıbergenniń de ónerin tamashalaıtyn bolady.