Elbasy tapsyrmasyna sáıkes «Jas maman» baǵdarlamasy «Jastar – El tiregi» ult jobasynyń bir bóligi bolady jáne «100/200» qaǵıdaty boıynsha iske asyrylady dep málimdedi Bilim jáne ǵylym mınıstri Erlan Saǵadıev Úkimet otyrysynda.
«Osy baǵdarlama aıasynda eki júz oqý orny, naqtyraq aıtsaq, 20 joǵary oqý orny men 180 kolledj 1-2 mamandyq boıynsha jańa qural-jabdyqtarmen jabdyqtalady» dedi mınıstr.
Bul oqý oryndary bilim berýmen qatar 1-2 mamandyq boıynsha basqa oqý oryndary úshin quzyret ortalyǵyna aınalatynyn eske salǵan vedomstvo basshysy, jańa quraldar satyp alyp, sheteldik áriptestermen kooperasııany jáne jańa oqý baǵdarlamalaryn damytý qajet ekenine toqtaldy.
«Eńbek jáne halyqty áleýmettik qorǵaý mınıstrligi «Atameken» palatasymen birge 100-den asa qajet mamandy anyqtaıdy, olar bilim berý uıymdary úshin satyp alatyn jabdyqty tańdaýǵa negiz bolady.
Jabdyqty satyp alý mehanızmi daıyn. Lızıng tetigi arqyly qarjylandyrý 7 jylǵa beriledi, «BRK-Lızıng» úshin syıaqy jylyna 11 %-dan aspaıtyn bolady.
Kolledjder lızıngti tóleý úshin 7 jyl ishinde aqshany tolyq alady dep josparlanyp otyr. JOO-larǵa lızıng tólemi boıynsha respýblıkalyq bıýdjetten qarjy bólý ázirshe qaralmaǵan. О́ıtkeni, biz olarǵa byltyrǵy jyly barlyq tehnıkalyq mamandyqtar boıynsha grant baǵasyn úsh júz qyryq bes myńnan 600 myńǵa deıin kóterdik» dedi Erlan Saǵadıev.
Baǵdarlama aıasynda jańarýǵa tıisti jabdyqtar men tehnıkalar tizimin «Atameken» ulttyq palatasy jáne «BRK-Lızıng» aksıonerlik qoǵamynyń kelisimi boıynsha «Kásipqor» holdıngi bekitetin bolady.
Mınıstrdiń aıtýynsha, qatysýdyń mindetti sharty – kolledjder úshin 5%, joǵary oqý oryndary úshin 10% qosa qarjylandyrý bolady dep josparlanyp otyr.
Sondaı-aq «Kásipqor» holdıngi sheteldik jáne otandyq mamandardy tartý boıynsha sharalar qabyldaıdy. Kolledjder úshin mamandar 2 oqý jylyna deıin tartylatyn bolady.
Jalpy, 3 jylda baǵdarlamany iske asyrý úshin respýblıkalyq bıýdjetten 57,9 mlrd teńge bólý talap etiledi. Bıyl – 8,0 mlrd teńge – lızıng tólemderdi óteýge 7,3 mlrd teńge, sheteldik jáne otandyq mamandardy tartýǵa 0,7 mlrd teńge qajet.
Al 2020 jyly 27,8 mlrd teńge – lızıng tólemderdi óteýge 16 mlrd teńge, sheteldik jáne otandyq mamandardy tartýǵa 1,88 mlrd teńge, «Lızıng» BRK kapıtaldandyrýǵa 10 mlrd teńge; 2021 jyly – 22,1 mlrd teńge – lızıng tólemderdi óteýge 16 mlrd teńge, sheteldik jáne otandyq mamandardy tartýǵa 1,17 mlrd teńge, «Lızıng» BRK kapıtaldandyrýǵa 5 mlrd teńge jumsalady.
«Jas maman» baǵdarlamasyn iske asyrýdyń nátıjesinde 3 jyl ishinde 20 JOO men 180 kolledjdiń negizgi mamandyqtaryn jańǵyrtý júzege asyrylatyn bolady, zamanaýı jabdyqtardyń 400-den astam jıyntyǵy satyp alyndy, 210 myńnan astam bilikti kadr daıarlanyp, 15 myńnan astam oqytýshy biliktiligin arttyrady» dedi Bilim jáne ǵylym mınıstri.