Memleket basshysy «Bolashaqqa baǵdar: rýhanı jańǵyrý» baǵdarlamalyq maqalasyndaǵy «Týǵan jer» jobasynda árbir azamatty kindik qany tamǵan jerine, ósken aýylyna, qala men óńirine qyzmet etýge shaqyrǵan bolatyn. Osynaý eldik deńgeıdegi bastamaǵa Shymkent qalasyndaǵy kásipkerler de óz úlesterin qosýda. Nátıjesinde úshinshi megaqalada 84 joba júzege asyryldy.
Shymqalany shyraılandyrý úshin jasalynǵan 32 joba «Týǵan jer» arnaıy jobasynyń «Atameken» kishi baǵdarlamasy sheńberinde júzege asyrylǵan. Bul maqsatta demeýshiler men mesenattar esebinen 1,6 mlrd teńge bólingen. Igi bastamalardyń basynda «Otaý grýpp» JShS men «Atameken» korporasııasy tur. Atalǵan mekeme memleket-jekemenshik áriptestik aıasynda quny 280 mln teńgeni quraıtyn, 110 oryndyq ınklıýzıvti bilim berý ortalyǵyn salyp berdi. Al «Atameken» korporasııasy 547 mln teńgeni quraıtyn 320 oryndyq balabaqsha qurlysyna kómek kórsetken.
Elbasynyń baǵdarlamalyq maqalasyndaǵy «Tárbıe jáne bilim» baǵyty boıynsha Shymqalada 138 is-shara uıymdastyrylyp, qaladaǵy 94 mektepte robot-tehnıkasy kabıneti ashyldy. 164 muǵalim tıisti kýrsta bilimin jetildirdi. Sonymen qosa «Rýhanı qazyna» baǵdarlamasy boıynsha Shymkenttegi qasıetti, kıeli oryndar men týrıstik mańyzy bar eskertkishterge, jalpy sany 18 nysanǵa QR kodtar ornatyldy. «Otyrar» kitaphanasynan kovorkıng ortalyǵy ashyldy. «Ádebı ólketaný» jobasy aıasynda túrli konkýrstar, kezdesýler, aıtystar, ashyq sabaqtar, konferensııalar men semınarlar ótkizilip, kitaptar basyp shyǵaryldy.
Nurshat TО́KEN,
«Egemen Qazaqstan»
ShYMKENT