«Qazaq Epos» aǵartý jobasy «Tulpar minip, tý alǵan!» respýblıkalyq baıqaýynyń erejesi

1. Jalpy ereje

1.1. «Qazaq Epos» aǵartý jobasy «Tulpar minip, tý alǵan!» baıqaýy (budan ári — Baıqaý) Qazaqstan Respýblıkasynyń Prezıdenti N.Á.Nazarbaevtyń «Bolashaqqa baǵdar: rýhanı jańǵyrý», «Uly dalanyń jeti qyry» maqalalarynda júktelgen mindetterdi júzege asyrý maqsatynda uıymdastyrylady.

1.2. Baıqaý respýblıka kóleminde ótkiziledi.

1.3. Baıqaýǵa oqytý tiline qaramastan, memlekettik jáne memlekettik emes jalpy orta bilim beretin mektepterdiń, lıseılerdiń, gımnazııalardyń jáne jalpy bilim beretin uıymdardyń 6-10 synyptarynyń oqýshylary qatysa alady. Ár mektepten kem degende 10 oqýshy (6-shy synyptan 2 oqýshy, 7-shi synyptan 2 oqýshy, 8-shi synyptan 2 oqýshy, 9-shy synyptan 2 oqýshy, 10-shy synyptan 2 oqýshy) jáne oqýshylardy daıyndaıtyn 5 muǵalim qatysady (Ár muǵalim 2 oqýshydan artyq daıyndaı almaıdy). 

1.4. Baıqaý – qazaq halqynyń batyrlyq epostaryn jatqa aıtý boıynsha ótedi. Baıqaý aıasynda qatysýshylarǵa «Qobylandy batyr» jyryn jatqa aıtý, jyrda kezdesetin kónergen sózderdiń mán-maǵynasyn túsindirý, qazaq ádebıeti pániniń oqý baǵdarlamasy negizinde ázirlengen suraqtarǵa jaýap berý tapsyrylady.

1.5. Osy ereje baıqaý sharalary aıaqtalǵanǵa deıin qoldanys kúshin joımaıdy.

1.6. Qosymsha aqparattar men «Qobylandy batyr» jyrynyń elektrondy nusqasy www.qazaqepos.com resmı saıtynda jarııalanady.

2.  Baıqaýdyń maqsaty men mindetteri:

- balalar arasynda kitap oqýdy jáne qazaq halqynyń batyrlyq epostaryn nasıhattaý;

- óskeleń urpaqtyń shyǵarmashylyq jáne zııatkerlik qabiletin damytýǵa jaǵdaı jasaý;

- balalardy halyq poezııasyna, qazaq halqynyń rýhanı asyl murasyna degen súıispenshilikke jáne patrıotızmge tárbıeleý, eldik pen erlik rýhyn, namysqoı, qaısarlyq qasıetterge baýlý;

- balalardyń ádebıetke, kórkem ádebıetke degen súıispenshiligin oıatý;

- daryndy balalardy anyqtap, olarǵa qoldaý kórsetý;

- ónerli jastardy halyq arasynda tanytý;

- qazaq tili jáne ádebıeti páni muǵalimderiniń bedelin kóterý.

3. Uıymdastyrý komıtetiniń qyzmeti

3.1. Baıqaýdy Aqparat jáne kommýnıkasııalar, Bilim jáne ǵylym mınıstrlikteri, Astana, Almaty, Shymkent qalalary men Oblystyq ákimdikterdiń jáne «Habar» agenttiginiń qoldaýymen «Qazaq Epos» qoǵamdyq qory júzege asyrady. Uıymdastyrý  komıtetiniń quramyna jergilikti atqarýshy organ jáne «Qazaq Epos» qoǵamdyq qorynyń ókilderi kiredi.

3.2. Uıymdastyrý komıteti ókilettiligi:

- Baıqaýdyń ótkizilý sharttary men erejesin bekitedi;

- Qazaqstan Respýblıkasynyń qoǵam jáne memleket qaıratkerleri men ǵalym-ádebıetshilerden turatyn baıqaýdyń qazylar alqasyn bekitedi; 

- Qazylar alqasynyń jumysyn úılestiredi;

- Qatysýshylarǵa aýdandyq, oblystyq kezeńderde usynylatyn suraqtardy ázirleıdi.

4. Baıqaýdy ótkizý kezeńderi, tártibi men sharttary:

4.1. Baıqaý 2 irikteý, 1 aqtyq kezeńnen turady:

- aýdandyq kezeń (2019 jyldyń 22-28 sáýir aralyǵynda);

- oblystyq kezeń (2019 jyldyń 29 sáýir – 23 mamyr aralyǵynda);

- respýblıkalyq aqtyq kezeń (2019 jyldyń 1-5 shilde aralyǵy. О́tkizilý orny — Astana qalasy. Televızııalyq joba).

4.2. Aýdandyq I-irikteý kezeń. Jergilikti bilim basqarmasynyń ókilderi Uıymdastyrý komıtetine 2019 jyldyń 20 aqpanyna deıin qatysýshylardyń tizimin beredi.

Tizimde kelesi aqparat kórsetilý kerek.

Qatysýshy mektep oqýshysy:

- qatysýshynyń tolyq aty-jóni (qatysýshynyń fotosy);

- eldi meken (oblys/qala/aýdan/aýyl);

- mektebi, oqıtyn synyby;

- oqýshyny daıyndaǵan muǵalimniń aty-jóni;

- baılanys telefony, e-mail.

Qatysýshy mektep oqýshylardy daıyndaıtyn muǵa­limder:

- muǵalimniń tolyq aty-jóni (muǵalimniń fotosy);

- eldi meken (oblys/qala/aýdan/aýyl);

- mektebi;

- daıyndaǵan oqýshylarynyń aty-jóni;

- baılanys telefony, e-mail.

Joǵaryda kórsetilgen aqparat qazaqepos@gmail.com elektrondy poshtasyna jiberilýi qajet.

4.2.1. Aýdandyq baıqaýǵa qatysýshylar Marabaı jyraý nusqasyndaǵy «Qobylandy batyr» jyryn jatqa aıtý boıynsha jarysady. 

Aýdandyq baıqaý 3 kezeń boıynsha órbıdi:

1) jyr aıtýdan saıys;

2) suraq-jaýap (jyr ishindegi jekelegen oqıǵalar men jer-sý ataýlaryna qatysty suraqtar);

3) jyrdyń ishindegi kónergen, tarıhı sózderdiń maǵynasyn ashý, túsindirý.

Aýdandyq baıqaýǵa qatysýshylar Marabaı jyraý nusqasyndaǵy «Qobylandy batyr» jyryn jatqa aıtý boıynsha jarysady.

4.2.2. Aýdandyq kezeńde júldeli úsh orynǵa ıe bolǵan 3 oqýshyǵa oblystyq Baıqaýǵa qatysýǵa joldama beriledi.

4.3. Oblystyq jáne Astana, Almaty, Shymkent qalalary boıynsha II-irikteý kezeńi. 

4.3.1. Oblystyq jáne Astana, Almaty, Shymkent qalalaryndaǵy baıqaýǵa qatysýshylar Marabaı jyraý nusqasyndaǵy «Qobylandy batyr» jyryn jatqa aıtý boıynsha jarysady.

Oblystyq jáne Astana, Almaty, Shymkent qalala­ryndaǵy baıqaý 3 kezeńnen turady:

1) Sahnaǵa shyǵý reti jerebe arqyly aldyn ala  anyqtalyp, sahnaǵa eki qatysýshydan shyǵarylady. Qazy­lar alqasy jas jyrshyny kez kelgen sátte toqtat­qanda, kelesi qatysýshy jyrdy ári qaraı jalǵastyra jónelýge daıyn bolýy kerek nemese qazylar alqasy jyr ishindegi oqıǵalar jelisi boıynsha jalǵastyrýdy usynýǵa quqyly (talap etken jaǵdaıda sol jerden jalǵastyrýy tıis);

2) Qatysýshylarǵa suraq bılet túrinde beriledi, ár bılette eki suraqtan bolady (6-10 synyptyń qazaq ádebıeti oqýlyǵy boıynsha ázirlenedi).

3) Jyrdaǵy turaqty sóz tirkesterin, qanatty sózderdi, teńeýlerdi anyqtap, maǵynasyn ashý (suraqtar qazylar alqasy tarapynan qoıylady).

Astana, Almaty, Shymkent qalalary men oblystarda jeńimpaz atanǵan oqýshylar respýblıkalyq aqtyq kezeńge qatysýǵa joldama alady.

4.3.2. Baıqaýdyń erejesi jáne suraqtar aldyn ala «Egemen Qazaqstan» gazetinde jarııalanady. Alaıda bılette suraqtardyń berilý formasy ózgergenimen maz­muny saqtalady.

5. Baǵalaý krıterııleri:

5.1. Qatysýshylardyń óneri 10 baldyq júıemen baǵalanady.

5.2. Qatysýshynyń shyǵarmany oqý mánerine jáne artıstik sheberligine nazar aýdarylady, ıaǵnı batyrlar jyryn naqyshyna keltirip, tógiltip jyrlaýy eskeriledi. Jyrdy aıtý barysynda qatysýshy múdirse, ne umytyp qalsa baıqaýdan shyǵarylady, al jeńgeni kelesi kezeńge ótedi. 

5.3. Qazylar alqasy oqýshynyń bilimin tekserý úshin qosymsha suraqtar qoıyp, daýys berý arqyly jeńimpazdardy anyqtaıdy.

6. Qazylar alqasy týraly:

6.1. Baıqaýǵa qatysýshylardyń ónerin baǵalaý úshin qazylar alqasy qurylady.

6.2. Qazylar alqasynyń sheshimi túbegeıli bolyp tabylady jáne qaıta qaralmaıdy.

6.3. Qazylar alqasy qatysýshylardyń árbir múdirgenin qalt jibermeı, belgilep otyrýy tıis.

6.4. Qazylar alqasynyń sheshimi hattama túrinde rásimdeledi jáne oǵan barlyq músheleri qol qoıady. Daýys­tar sany teń túsken jaǵdaıda qazylar alqasynyń tóraǵasy sheshýshi daýysqa ıe bolady.

7. Marapattaý

7.1. Aýdandyq kezeńde 1, 2, 3 oryn alǵan jeńimpazdar baıqaýdyń oblystyq kezeńine ótedi. Al jeńimpaz oqýshy­lardyń muǵalimderi Bilim jáne ǵylym mınıstriniń arnaıy dıplomymen marapattalady.

Aýdandyq kezeńniń jeńimpaz oqýshylary aqshalaı syıaqymen marapattalady.

I oryn – 150 000 (júz elý myń) teńge;

II oryn – 100 (júz myń) teńge;

III oryn – 50 (elý myń) teńge;

7.2. Astana, Almaty, Shymkent qalalary men oblys­tarda 1-oryn ıelengen jeńimpazdar  (17 oqýshy) respýb­lıkalyq baıqaýǵa joldama alady.

7.3. Respýblıkalyq aqtyq baıqaýdyń erejesi, talaptary men sharttary alǵashqy 2 irikteý kezeńi aıaqtalǵan soń jarııalanatyn bolady. Oblystyq baıqaýdyń jeńim­pazdary kelesideı aqshalaı syıaqymen marapattalatyn bolady:

Oqýshylar úshin:

I oryn (bireý) – 1 000 000 (bir mıllıon) teńge;

II oryn (bireý) – 600 000 (alty júz myń) teńge;

III oryn (bireý) – 300 000 (úsh júz myń) teńge.

Ustazdar  úshin:

I oryn (bireý) – 2 000 000 (eki mıllıon) teńge;

II oryn (bireý) – 1 200 000 (bir mıllıon eki júz myń) teńge;

III oryn (bireý) – 600 000 (alty júz myń) teńge.

Baıqaý erejesine ózgerister engizilse qosymsha habarlanady.

Uıymdastyrý komıtetiniń mekenjaıy:

010000, Astana qalasy, Q.Sátbaev kósh., 8. 4-qabat, 400-kabınet 

Tel.: 8 701 782 62 22, e-mail: qazaqepos@gmail.com