«TKSh QazOrtalyǵy» AQ men kanadalyq Black Powder Solutions Inc. kompanııasy О́zara túsinistik týraly memorandýmǵa qol qoıdy.
Elimizdiń kommýnaldyq sharýashylyǵyn damytý úshin birlesken eki tarap ozyq tehnologııalar men ázirlemelerdiń transferin júzege asyryp, Qazaqstan Respýblıkasynyń aýmaǵynda tájirıbe júzinde paıdalanýdy kózdeıdi. Ári atalǵan uıymdar uzaq merzimdi áriptestik ornatý múmkindigin qarastyrady. Bul týraly búgin «TKSh QazOrtalyǵy» AQ baspasóz qyzmeti habar taratty.
О́z kezeginde Black Powder Solutions jylý jáne sýmen jabdyqtaý júıeleriniń qubyrlarynda ornatylǵan magnıtti separatorlardyń kómegimen sýdy tazartý tehnologııasyn usynyp otyr. Separatorlardaǵy arnaıy súzgiler sýdan qara untaq bólshekterin (tot, temir oksıdi) alyp tastaıdy. Bul totyǵý úderisiniń baıaýlaýyna alyp keledi jáne qubyrlardyń qyzmet etý merzimin 1,5 – 2 ese uzartýǵa múmkindik berip, paıdalaný tıimdiligin jaqsartady. Osyndaı tehnologııalar kómirsýtek shıkizaty men tehnologııalyq suıyqtyqtardy tazartý úshin taý-ken jáne munaı-gaz salalarynda qoldanylady.
Black Powder Solutions prezıdenti Rodjer Sımonson (Roger Simonson) atap ótkendeı, tehnologııa 18 jyl buryn oılap shyǵarylǵan jáne qazir 40 elde qoldanylady:
«Biz ózimiz ázirlegen tehnologııalardy únemi jaqsartyp otyramyz. Olardy Soltústik jáne Ońtústik Amerıka, Japonııa, Ońtústik Koreıa, Avstralııa, Afrıka, Taıaý Shyǵys, Eýropa elderinde kóptegen kásiporyndar paıdalanady. Magnıtti súzý tehnologııasy ekologııalyq taza bolyp tabylady jáne qorshaǵan ortaǵa eshqandaı teris áser etpeıdi. Qazaqstanǵa alǵash ret kelip turmyz, bolashaqta osynda óz ustanymymyzdy bekitip, bıznesimizdi keńeıtip, kórshi elderdiń naryqtaryna shyǵýǵa múmkindik beretin baza quramyz dep úmittenemiz», – deıdi Rodjer Sımonson.
«TKSh QazOrtalyǵy» AQ dırektory – Basqarma múshesi Ádilhan О́mirbaev: «Jaqyn arada Black Powder Solutions magnıttik separatorlary Oral jáne Aqtaý qalalarynda ystyq jáne sýyq sýmen jabdyqtaýdyń tehnologııalyq magıstraldarynda ornatylady. Birneshe aı boıy zertteý júrgiziledi. Pılottyq jobaoń nátıjeler bergen jaǵdaıda, jobany basqa óńirlerde iske asyrý máselesi jáne Qazaqstan aýmaǵynda osyndaı jabdyqtar óndirisin oqshaýlaý múmkindigi qaralatyn bolady».
Aıta ketý kerek, jaqynda Astana men Qyzylordada jylýmen qamtamasyz etý qubyrlarynyń qyzmet merzimin uzartýǵa jáne nyǵaıtýǵa arnalǵan Merus nemis totyǵýǵa qarsy aspaptaryn ornatý jáne synaqtan ótkizý boıynsha pılottyq joba bastaldy. Qazirgi ýaqytta júrgizilgen zertteýler jaqsy nátıje kórsetýde – sýdaǵy temir deńgeıi 80%-ǵa tómendedi. Sonymen qatar basqa sheteldik kompanııalarmen kezdesýler ótkiziledi. TKSh sektoryna neǵurlym ozyq jáne tıimdi sheteldik tehnologııalardy tartý boıynsha jumysty «TKSh QazOrtalyǵy» QR Investısııalar jáne damý mınıstrliginiń 2017-2021 jyldarǵa arnalǵan strategııalyq josparyn iske asyrý sheńberinde salanyń energııa tıimdiligin arttyrý jáne sáýlet, qala qurylysy jáne qurylys qyzmeti salasyndaǵy ulttyq ınnovasııalyq júıeni damytý salasynda júrgizýde.
Aınash ESALI,
«Egemen Qazaqstan»
ALMATY