«Egemen Qazaqstan» saıty Chempıondar lıgasyna sholýdy jalǵastyrady. Búgin Astana ýaqyty boıynsha saǵat 02:00-de «Aıaks» pen «Real Madrıd», «Tottenhem» men «Borýssııa Dortmýnd» klýbtary kezdesedi.
«Aıaks» – «Real Madrıd»
Búgingi oıyndardyń basty matchy – «Aıaks» pen «Real» arasyndaǵy kezdesý ekeni anyq. Onyń birneshe sebebi bar. Birinshiden, «Real» osyǵan deıin qatarynan úsh ret Chempıondar lıgasyn jeńip alǵan bolatyn. Koroldik klýb bul joly da qos qulaqty kýbokty basynan asyra kótersek dep armandaıdy. Ekinshiden, «Aıaks» ta ońaı shaǵylatyn jańǵaq emes. Ári kezdesý Amsterdamda ótetinin eskersek, «qudaıdyń balalaryn» qalpaqpen uryp alý qıynǵa aınalady.
Aldaǵy kezdesýde gollandııalyq klýbqa shabýylshy Bande kómektese almaıdy. Ol jaraqatynan áli aıyqqan joq. Sondaı-aq ortalyq qorǵaýshy Frenk de Iongtyń oıynǵa qatysýy ekitalaı. Al «Madrıd» sapynan Lorento men Isko alańǵa shyqpaıdy. Qalǵan fýtbolshylar matchqa saqadaı saı.
Ásirese, «Realdyń» asyǵy alshysynan túsip tur. Maýsymdy ala-qula bastaǵan koroldik klýb aqpan kelgende ashýyna mindi. Áýeli «Kamp Noýda» basty qarsylasy «Barselonany» biraz sastyrsa, ótken aptada madrıdtik derbıde «Atletıkodan» aılasyn asyrdy. Al «Aıaks» kerisinshe keıingi úsh oıynnyń ekeýinde utylyp qalǵan-dy.
Jalpy, eki komanda ózara 12 márte kezdesipti. Sonyń 7-eýinde «Real» basym tússe, 4 ret «Aıaks» jeńiske bastar joldy jańylmaı tapty. Bir oıyn ǵana teń aıaqtalǵan eken.
Aıta keterligi, keıingi ótken 6 matchta «Madrıd» qatarynan jeńiske jetti. Eki komanda úsh ret qatarynan toptyq kezeńde oınaǵan-tuǵyn. Amsterdamdyqtar qansha talpynsa da, qarsylasynan aılasyn asyra alǵan joq.
«Egemen» boljam: Búgingi match «Iohan Kroıf» arenada ótetinine qaramastan, «Realdyń» basym bolýy yqtımal. Sondyqtan «Egemen» osy oıynda koroldik klýb 3:1 esebimen jeńiske jetedi dep esepteıdi.
«Tottenhem» – «Borýssııa D»
Osy kezeńdegi eń tartysty oıyn «Tottenhem» men «Borýssııa Dortmýnd» arasynda ótetini sózsiz. О́ıtkeni eki komanda da shabýyldaýdy jany súıedi. Onyń ústine, eki komandanyń bir-birine ketken esesi jeterlik.
Byltyr Chempıondar lıgasynyń toptyq kezeńinde klýbtar bir topqa túsken-tuǵyn. О́tken maýsymdaǵy eki oıynda da londondyqtar qarsylasyna esh múmkindik bermedi. Birinshi kezdesýde 3:1 esebimen jeńiske jetse, qarymta matchta 1:2 esebimen basym tústi. Al odan bir jyl buryn, 2015-2016 jylǵy maýsymda komandalar dál osy 1/8 fınalda joly túıisken bolatyn. Sol kezde «Borýssııa» eki oıynda da jeńiske jetip, shırek fınalǵa shyqqan edi.
О́kinishke qaraı, eki klýb sapynda da jaraqat alǵan oıynshylar jeterlik. «Tottenhem» klýbynyń surmergeni Harrı Keın, ortalyq alańda oıqastaıtyn Delle Allı, qorǵaýshy Ben Devıs jaraqatynan jazylǵan joq. Dennı Roýzdyń alańǵa shyǵý-shyqpaýy ekitalaı.
Al dortmýndtyqtar sapynan qorǵaýshylar Akanjı, Lýkash Pıshek, jartylaı qorǵaýshy Marko Roıs pen shabýylshy Pako Alkaser matchqa qatyspaıdy. Olardyń bári jaraqatynan aıyǵyp úlgermedi. Al Iýlıan Vaıgl tumaýratyp qalǵan eken.
«Egemen» boljam: Eki komanda da qarymta shabýylǵa ıek artyp, qarsylasynyń osal tusyn tabýǵa tyrysatyny sózsiz. «Egemenniń» boljamy boıynsha «Tottenhem» bir dop aıyrmasymen jeńiske jetýi múmkin. Esep: 1:0