Aqtóbe qalasy ákimdiginiń qyzmetkerleri, depýtattar men kásipkerler ózderiniń aılyq tabysyn qoǵamdyq qorǵa aýdarady. Atalǵan bastama kóterilgen Ashyq esik kúnderi Aqtóbe oblysynda 15 aqpanǵa deıin sozylady.
Aqtóbede Ashyq esik kúnderi aksııasy jalǵasýda. Shara barysynda oblys turǵyndary Aqtóbe ákimdiginiń, oblystyq basqarmalardyń, quqyq qorǵaý organdarynyń jáne kommýnaldyq qyzmetterdiń basshylary men mamandaryna jeke suraqtary boıynsha tikeleı júgine alady. 8-12 aqpan aralyǵynda azamattardy qabyldaý pýnktterine 2267 suraqpen 2155 adam kelgen.
Turǵyn úı, ataýly kómek, áleýmettik jáne jer máseleleri, turǵyn úı-kommýnaldyq sharýashylyq problemalary turǵyndardy jıi tolǵandyrady eken. Jeke sharýalarymen qaıyrylǵan azamattardyń barlyq máseleleri taldanyp, aldaǵy jumys baǵyttary anyqtaldy. Aksııa kezinde balalardy balabaqshalar men mektepterge ornalastyrý, materıaldyq kómek kórsetý, tegin dári-dármek bólý jáne birneshe adamdy jumysqa ornalastyrý sııaqty 220 másele sheshilgen. Kelip túsken 1801 másele boıynsha azamattarǵa keńes berildi, al birqatar suraqqa baılanysty odan ári is-qımyl jospary jasaldy. Áleýmettik jaǵynan az qamtylǵan taǵy 27 adamǵa jaqyn arada 2 mln. 650 myń teńge kóleminde materıaldyq kómek beriletin boldy. Qalǵan 219 másele qaralý ústinde.
Ashyq esik kúnderi aıasynda qala ákimdigi qoǵamdyq belsendiler, depýtattar jáne memlekettik mekemeler ókilderinen turatyn mobıldik toptar qurdy. Olar oryn alǵan máselelerdi sheshýdiń tıimdi tásilderin anyqtaý úshin kómekke asa muqtaj jandardyń otbasylaryna barmaq.
2017 jyly 17 qańtarda ómirde qıyn jaǵdaıǵa tap bolǵan adamdarǵa kómek kórsetý maqsatynda qurylǵan "Qolǵanat Aqtóbe" qoǵamdyq qoryna aılyq jalaqyny aýdarý týraly Aqtóbe ákimi Ilııas Ispanovtyń jeke bastamasy úlken oqıǵa bolǵany esimizde. Qor óz jumysyn tolyq kólemde bastady jáne sol jyly sáýir aıynda Aqtóbe qalasyndaǵy sý tasqyny saldaryn joıýǵa jáne muqtaj azamattarǵa kómek kórsetýde barynsha belsendilik tanytty.
Ákimniń bastamasyn depýtattar, kásipkerler men qoǵam qaıratkerleri qoldady. Aıta keteıik, Aqtóbe ákimi 2017 jyldan beri aı saıyn jetim Artem Stepanenkonyń shotyna aqsha aýdarady. Osy aýdarymdy sanamaǵanda, Ilııas Ispanov aǵymdaǵy aıdaǵy barlyq qalǵan jalaqysyn "Qolǵanat Aqtóbe" qoǵamdyq qorynyń shotyna aýdarmaq. Sondaı-aq, qala ákimdigi Aqtóbe oblysynyń ákimi Berdibek Saparbaevtyń tapsyrmasymen 2016 jyldan beri 443 jetim balaǵa áleýmettik-patronajdyq kómek kórsetýde.
14-15 aqpanǵa deıin sozylǵan Ashyq esik kúnderine azamattardy qabyldaý kelesi mekenjaılar boıynsha jalǵasady:
1) Sáńkibaı batyr 249, «Halyq keńsesi»;
2) T.Ahtanov kóshesi, T.Ahtanov atyndaǵy drama teatry;
3) Sáńkibaı batyr kóshesi 145 b, Astana aýdanynyń ákimdigi;
4) «Qarǵaly» turǵyn alaby, Qazan-60 jyl kóshesi 70 b, Almaty aýdanynyń ákimdigi.
Qabyldaý ýaqyty: saǵat 10.00-den 18.00-ge deıin.