Ártúrli jaǵdaılarǵa baılanysty keıde kóshede baǵdarshamdar jumys istemeı qalady. Mundaıda eki jaqtan kelgen kólik ıeleri birinshi bolyp ótýge tyrysyp mashınalaryn jol ortasyna suǵyndyryp jiberedi. Onyń arty – qulaq tesken aıqaı, qyzylkeńirdek daý.
Mine, osyndaı jaǵdaı Qyzylorda qalasyndaǵy Jibek joly men Sultan Beıbarys kósheleriniń qıylysynda bolǵan. Osy kezde bir azamat polısııa qyzmetkerleri jetkenshe jol ortasyna shyǵyp kóshe qıylysyndaǵy retsizdikti ózinshe rettegen. Bylaı qaraǵanda, nıeti jaqsy bolǵanymen zań júzinde azamattyń jasaǵan áreketi durys bolmaı shyqty.
Bul jóninde túsinik bergen Qyzylorda oblystyq polısııa departamentiniń baspasóz qyzmeti: «Kóshe qıylysyna jaıaý júrginshige shyǵýǵa tyıym salynady. О́ıtkeni ol óziniń qaýipsizdigimen qatar kólik quraldarynyń kóshe qıylysynan ótýine qaýip týǵyzady. Atalmysh oqıǵa boıynsha baǵdarshamnyń jumys istemeı qalǵany týraly habarlama tirkelgen ýaqytta patrýldik polısııa beketine jiberildi. Ýaqtyly atalǵan kóshe qıylysyna retteýshi qoıyldy. Baǵdarshamnyń jumys istemeýi jáne kóshe boıynsha keptelis bolǵan kezde tıisti oryndarǵa habarlasýy tıis», dedi.
El ishi bolǵan soń elgezek adamdar kóp. Polısııa kelgenshe jol qozǵalysyn rettemek bolǵan álgi azamatqa ákimshilik hattama toltyrylǵan. Mashınalar juldyzdaı aǵyp ótip jatqan qıylysta otpen oınaýǵa bolmaıdy. Jol rettegish azamat óz qateligin kesh túsingen syńaıly.
Baqtııar TAIJAN,
«Egemen Qazaqstan»
Qyzylorda oblysy