Batys Qazaqstan oblysynda «AQJAIYQ SKI RACE» kópshilik qysqy sporttyq sharasy ótip, bir myńǵa jýyq adam shańǵy tebýge shyqty. Olar ózderi tańdaǵan 2,5-5-7,5 shaqyrym qashyqtyqty júgirip ótip, arnaıy medalmen, marapat qaǵazdarymen marapattaldy.
Shańǵy jolyna shyqqan belsendilerdiń ishinde kásibı shańǵyshylar da, qarapaıym áýesqoılar da kóp boldy. Olardy sharany uıymdastyrýshylarmen birge Batys Qazaqstan oblysy ákiminiń orynbasary Ǵabıdolla Ospanqulov quttyqtady.
- Barshańyzdy búgingi sport merekesimen quttyqtaımyn. Búgin kún raıy da keremet bolyp, erekshe kóńil syılap tur eken. О́zderińizge málim, 2019 jyl Prezıdent Jarlyǵymen Jastar jyly dep jarııalandy. Elbasy qazaqstandyqtardy árdaıym sportpen aınalysýǵa shaqyrady. Sebebi sport, salaýatty ómir salty – saý ulttyń kepili. Al bizdiń óńirimizdiń jastary óte belsendi jáne sportqa jaqyn, - dedi Ǵabıdolla Abdollauly.
Kópshilik shańǵy tebý sharasynyń eń jas shańǵyshysy Janarys Jasulanuly men eń egde shańǵyshy Kákıden Ulyqpanuly arnaıy syılyq pen dıplomǵa ıe boldy. Uıymdastyrýshylar sondaı-aq Dýlat Júsipqalıevty «Belsendi volonter» dep atap, arnaıy marapattady.
Qazbek QUTTYMURATULY,
«Egemen Qazaqstan»