Vedomstvoaralyq komıssııanyń óńir basshysy Berdibek Saparbaevtyń tóraǵalyǵymen ótken otyrysynda jasóspirimder arasyndaǵy qylmystyń aldyn alý máselesi, sonymen qatar, kóńil kóterý oryndaryndaǵy qylmysty azaıtý sharalary qaraldy.
Jyl basynan beri túngi ýaqytta serýenge shyqqan aqtóbelik jasóspirimderdiń 128 ata-anasy ákimshilik jaýapkershilik jazaǵa tartylyp, olarǵa 2 mln teńge aıyppul taǵyldy. О́tken jyldyń tek tamyz aıynan bastap 2 myńǵa jýyq ata-ana eskertý aldy. Jastar saıasaty basqarmasynyń basshysy Nurlan Kúntýov habarlaǵandaı, óńirde «Jas saqshy» jastar patrýli óz jumysyn jalǵastyrýda. Búginde stýdentter birlestiginiń quramynda 100 myńnan asa jas bar.
Oblys ákimi: «Kámeletke tolmaǵan quqyqbuzýshylarmen maqsatty jumys isteý kerek. Stýdentter jataqhanasynda tártip bolýy tıis. Qylmystyń denin aýdandardan qalaǵa oqýǵa kelgen stýdentter jasaıdy. Olardyń bos júrmeýlerin baqylaýǵa alyńyzdar»,- dep tapsyrdy.
Oblys basshysynyń tapsyrmasymen qurylǵan quqyqbuzýshylyqtyń aldyn alatyn vedomstvoaralyq jumys toby qoǵamdyq jerlerde árdaıym reıdter júrgizip turady. Budan basqa, jumys toby qoǵamdyq qaýipsizdikti qamtamasyz etýdegi kóptegen júıelik kemshilikterdi joıýǵa múmkindik bergen birqatar tıimdi sharalardy uıymdastyrdy.
Berdibek Saparbaev kóńil kóteretin oryndarǵa árdaıym keshki reıd júrgizip otyrýdy tapsyrdy. Tirkelgen quqyqbuzýshylyqtar sany kóbirek oryn alatyn elý kóńil kóterý orny endigi baqylaýǵa alyndy.
«On kóńil kóterý ornynda anyqtalǵan eskertýler tolyqtaı joıyldy, 15-i berilgen buıryqty oryndap jatyr, úsh nysannyń basshysy ákimshilik jaýapkershilikke tartyldy, sonymen qatar, eki nysannyń jumysy toqtatyldy»,- dep baıandady kásipkerlik jáne týrızm basqarmasynyń basshysy mindetin atqarýshy Asqar Kókeev.
Sondaı-aq, aýlalar men kóshelerde beıne baqylaý kameralaryn ornatý jumystary júrgizilip jatyr. Aqtóbe boıynsha 278 aýlada 1 358 kamera ornatylǵan. 1 634 kópqabatty úıdiń aýlasy men kire berisi túngi ýaqytta jaryqtandyrylady. Oblys ákimi jurtshylyqty quqyqbuzýshylyqtyń aldyn alýǵa tartýdy tapsyrdy.
B.Saparbaev: «Halyqtyń qaýipsizdigi bárinen joǵary. Qoǵamdyq qaýipsizdikti qamtamasyz etýdi birge júrgizý kerek. Quqyqqorǵaý baǵyttylyǵynyń qoǵamdyq qurylymdarynyń jumysyn kúsheıtý qajet»,- dep atap ótti.
Jalpy, osy jyldyń basynan beri qylmystyq quqyqbuzýshylyqtyń 10,4%-ǵa tómendegeni tirkeldi.