Qazaqstandyq jas shahmatshy, Halyqaralyq shahmat federasııasynyń sheberi Bıbisara Asaýbaevanyń anasy Lıana Tańjaryqova sportshynyń Qazaqstanǵa oralý sebepterin aıtty. Bul týraly QazAqparat habarlady.
«Bıbisaranyń Qazaqstanda jetistikke jetýi birneshe sebepten múmkin bolmaı turdy. Men onyń ákesimen ajyrasyp ketkenmin. Bıbisaranyń aǵasy bizdiń alǵashqy altyn medalimizden soń únemi aıaqtan shala bastady. Biraq, biz qarsylasa almadyq. Sebebi, ol kezde aǵasy bedeldi sheneýnik bolatyn. Bizdi sharalarǵa shaqyrmaıtyn boldy. Shahmattyń damýyna qatysty kóp sharalar Bıbisaranyń qatysýynsyz ótip jatty», - dedi Lıana Tańjaryqova.
Bul jaǵdaılardan soń anasy qyzyn alyp, Reseıdiń týyn jelbiretýge ketti. Olardy Máskeý oblystyq shahmat federasııasynyń prezıdenti Sergeı Nesterov shaqyrǵan.
«Bıbisara Reseı qorjynyna alǵashqy altyn medaldi salǵan soń, bizdiń «aǵamyz» kedergi keltire almaıtyn boldy. Men ońtaıly sátti paıdalanyp, Qazaqstan Prezıdenti Nursultan Nazarbaevqa hat jazdym. Bizdi qabyldap, qaıta oralýymyzǵa ruqsat berildi. Reseıde bizge páter berilgen. Ony jekeshelendirip alýǵa da bolar edi. Sport formasyn alyp, Sport mınıstrliginen qarjylandyrýǵa da qol jetkizýge bolar edi. Biraq tek qana tólqujat aýystyrǵan jaǵdaıda. Biz tólqujat aýystyrmadyq! Men V.Pýtın bersin degen shart qoıdym. Bul oryndalýy múmkin emes shart edi», - dedi shahmatshynyń anasy.
Onyń aıtýynsha, Bıbisaranyń kelýine Mańǵystaý oblysynan usynys túsken. Olarǵa AQSh-tan da shaqyrtý kelgen.
«2018 jyldyń qarashasynda AQSh-qa Garrı Kasparovtyń sessııasyna shaqyrdy. Ol jaqta sportshylarǵa jaqsy jaǵdaı jasalǵan. Olarda Amerıkanyń kez-kelgen JOO-sy grant beredi, júrip-turýy tegin bolady. AQSh-ta óz tólqujatyńdy aýystyrmasań da bolady. Olarda ondaı talap joq», - dedi Lıana Tańjaryqova.
Osynyń bárin oılana kele sportshynyń anasy ári menedjeri Qazaqstanǵa kelý týraly sheshim qabyldaǵan.
«Sizder patrıot bolyp ketti dep oılaısyzdar ma? Iá, dál solaı. Patrıotpyz. Biz óz elimizden basqa eshkimge kerek emespiz! Men ómirden sabaq alyp kele jatyrmyn! Men Elbasy Nursultan Ábishulyna alǵys aıtamyn! Ol sportshy balalardy nazarynan tys qaldyrǵan emes. 2019 jyldyń Jastar jyly dep jarııalanýy - Prezıdenttiń kóregendigin bildiredi. Bıbisara endi óz eliniń laıyqty qyzy bolýy úshin baryn salatyn bolady», - dedi anasy.
Sonymen qatar, Lıana Tańjaryqova QR Prezıdenti ákimshiliginiń jetekshisi Áset Isekeshovke, belgili bıznesmen Qaırat Boranbaevqa, Ǵalymjan Esenovke, Arystanbek Muhamedıulyna alǵysyn bildirdi.
«Barlyǵyńyzǵa qıyn sátte demeý bolǵandaryńyz úshin alǵys aıtamyn. Bıbisaraǵa bapkerge qarsy turý ońaı bolǵan joq. Men tek sot bitkenin kúttim. Men bizdiń jeńiske jetetinimizge senimdi boldym. Bapkerdiń bizge taqqan aıyptary jalǵan bolatyn. Sot ádil sheshim shyǵardy. Advokattarymyz Aleksandr Dobrovınskııge, Marına Dýbrovskaıaǵa, Irına Býlkatovaǵa alǵys aıtamyn! Olar - Naǵyz óz isiniń mamandary! Endi Bıbisara Asaýbaeva óz Otanynyń namysyn bar yntasymen qorǵaıtyn bolady», - dedi ol.
Aıta ketý kerek, 2017 jyldyń kúzinde Reseı Shahmat quramasynyń bapkeri Evgenıı Solojenkın Bıbisara Asaýbaevany alaıaqtyq jasady dep aıyptady. Onyń aıtýynsha, Bıbisara Ýrýgvaıdaǵy álem chempıonaty kezinde elektrondy nusqaý berýshini paıdalanǵan degen ýáj keltirdi. Ol kezde Bıbisara 14 jasqa deıingi qyzdar arasynda oınaıtyn. Keıinirek Máskeý apellıasııalyq soty Asaýbaevanyń óz ar-uıatyn qorǵaý týraly aryzyn qanaǵattandyrdy. Jas sportshy jaqynda Qazaqstan quramasyna endi. Ol endi Astanada 4-15 naýryz aralyǵynda ótetin álem chempıonatynda baq synaıtyn boldy.