Oral qalasynda Móńkeuly kóshesindegi kóp qabatty úılerdiń birine kanadalyq sý tazartqysh «Black powder» magnıtti súzgisi ornatyldy. Jańa qondyrǵynyń tıimdiligi men nátıjesi eki aılyq synaqtan keıin tekseriletin bolady.
- Qondyrǵynyń qurylymy óte qarapaıym, qubyrdaǵy sý óte qýatty qos magnıt taıaqshanyń arasynan ótedi. Sol kezde sý quramyndaǵy tat, temir oksıdi t.b. tutylyp qalady. Buǵan elektr qýaty, qosymsha shyǵyn ketpeıdi. Turǵyndardyń tutyný tarıf baǵasy da ózgermeıdi. Pılottyq joba boıynsha bul súzgi ázirge tegin ornatylyp otyr, - deıdi «Jaıyqjylýqýat» mekemesiniń óndiristik-tehnıkalyq bólim bastyǵy Bolat Bataev.
Bul qondyrǵyny elimizge ákelip, qazaqstandyqtardyń ıgiligine usynyp júrgen - «Turǵyn úı kommýnaldyq sharýashylyǵyn jańǵyrtý men damytýdyń qazaqstandyq ortalyǵy» AQ eken. Bul uıym kanadalyq Black Powder Solutions Inc. kompanııasymen arada memorandým jasap, Qazaqstan Respýblıkasynyń kommýnaldyq sharýashylyǵyn damytý úshin birlesken jobalardy júzege asyrýǵa kirisken.
Aksıonerlik qoǵamnyń Batys Qazaqstan oblysyndaǵy fılıaly tóraǵasy Nurlan Myrzaǵalıevtiń aıtýynsha, Black Powder Solutions magnıtti separatorlarynyń kómegimen tazartylǵan sý adam densaýlyǵyna paıdaly bolýymen qatar, qubyrlardyń qyzmet etý merzimin 1,5-2 ese uzartýǵa múmkindik beredi. Bul tehnologııa 18 jyl buryn oılap tabylǵan, búginde álemniń 40 elinde qoldanylady. Al Qazaqstan boıynsha ázirge eki-aq qalada: Aqtaý men Oral shaharynda ornatylǵan. Pılottyq joba oń nátıje bergen jaǵdaıda, jobany basqa óńirlerde iske asyrý máselesi qaralatyn bolady.
Qazbek QUTTYMURATULY,
«Egemen Qazaqstan»
Batys Qazaqstan