Bul týraly Indýstrııa jáne ınfraqurylymdyq damý mınıstri Roman Sklıar búgingi Úkimet otyrysynda málimdedi.
Búginde respýblıka boıynsha 340 myń kópbalaly otbasy bar. Sonyń ishinde 28 myń otbasy turǵyn úı kezeginde tur. Mınıstr osyndaı málimet aıta kelip: «Memleket basshysynyń tapsyrmasyna sáıkes, biz jeti jyldyń ishinde jyl saıyn 6 myń jaldamaly páterdi salyp otyramyz. Sóıtip, 2025 jylǵa deıin 40 myńnan astam jaldamaly páter turǵyzylady. Sol kezde kezekte turǵan kópbalaly otbasylardyń baspana máselesi tolyǵymen sheshiledi. Bıyl mamyr aıynda kópbalaly otbasylarǵa jaldamaly páterdi berýdi bastaımyz», - dedi.
Esterińizge sala keteıik, «Nur Otan» partııasynyń kezekti XVIII sezinde Nursultan Nazarbaev «Nurly jer» baǵdarlamasyn keńeıtip, sonyń aıasynda kópbalaly otbasylarǵa 40 myń jaldamaly páter salýdy tapsyrdy. «Úkimetke «Nurly jer» baǵdarlamasy aıasynda kópbalaly otbasylar ishindegi az qamtylǵan otbasylarǵa basymdyq bere otyryp, 40 myńnan astam jaldamaly páter salýdy tapsyramyn. Bul maqsatqa taıaý 7 jylda jyl saıyn 50 mlrd teńge bólinetin bolady», dedi Memleket basshysy.