Aıbatyr Jumaǵulov «Mindetti áleýmettik medısınalyq saqtandyrý qory» KEAQ basqarma tóraǵasy bolyp taǵaıyndaldy.
«Aıbatyr Nyshanbaıuly qarjylyq qurylymdarda mol tájirıbe jınaqtaǵan bilikti maman. Ulttyq ekonomıka mınıstrliginde elimiz úshin mańyzy bar jobalarǵa jetekshilik etti. Bul tájirıbeniń Medısınalyq saqtandyrý qorynda paıdaǵa asary daýsyz. Qor kepildendirilgen tegin medısınalyq kómek jáne mindetti áleýmettik medısınalyq saqtandyrý paketteri sheńberinde kórsetiletin qyzmetterdi strategııalyq satyp alýshy statýsyna ıe. Jumystyń ashyq, júıeli túrde júrgizilýin qamtamasyz etý qajet. MSQ qarjylyq ınstıtýt retinde qanshalyqty tıimdi jumys istese, reformanyń iske asyrylýy da tabysty bolmaq. Bul úlken jaýapkershilik júkteıtin qyzmet. Jańa basshynyń bul mindetterdi abyroımen atqaratynyna senimim mol», dedi Densaýlyq saqtaý mınıstri Eljan Birtanov.
A.Jumaǵulov ár jyldary QR Indýstrııa jáne tehnologııalar mınıstrliginde, «Báıterek» ulttyq basqarý holdıngi» AQ-da eńbek etti. «Baur Kazakhstan» kompanııalar tobynyń Dırektorlar keńesiniń múshesi, «Turǵynúıqurylysjınaqbanki» AQ basqarma tóraǵasy boldy. 2017 jyldyń qańtarynan bastap Ulttyq ekonomıka vıse-mınıstri qyzmetin atqardy.