Olımpıadanyń alaýy tutandy

Olımpıadanyń alaýy tutandy

Juma, 11 mamyr 2012 7:12

Keshe Grekııada Londonda ótetin 2012 jylǵy Jazǵy Olımpııa oıyndarynyń alaýy kún sáýlesinen tutan­dy­ryldy. Grekııalyq aktrısa Ino Menegakı rásim barysynda tutanǵan alaýdy ony alǵashqy alyp júretin júzgish Spıros Iаnnıotıske tapsyrdy.

 

Juma, 11 mamyr 2012 7:12

Keshe Grekııada Londonda ótetin 2012 jylǵy Jazǵy Olımpııa oıyndarynyń alaýy kún sáýlesinen tutan­dy­ryldy. Grekııalyq aktrısa Ino Menegakı rásim barysynda tutanǵan alaýdy ony alǵashqy alyp júretin júzgish Spıros Iаnnıotıske tapsyrdy.

Iаnnıotıs Olımpıada alaýynyń birinshi kezeńinde júgirse, eldegi bul úderis 8 kúnge sozylady. 17 mamyrda Olımpıada alaýy Afınadaǵy stadıonǵa jetkizilip, sol arada Londondaǵy oıyndy uıymdastyrýshylarǵa tapsyrylady. Jetpis kúnge sozylatyn estafeta barysynda Olımpıada alaýy 12,8 myń shaqyrym joldan ótedi.

 

LAŃKESTIKTEN OPAT BOLǴANDAR KО́P

Sırııanyń astanasy Damask qala­syn­da keshe erteńgisin qosarlanǵan lańkestik jasalyp, sonyń saldarynan 40-tan as­tam adam qaza tapty. Jara­lanǵandar sany 170 adamnan asady delinip otyr. Jarylystar Sırııa barlaý qyzmetiniń shtab-páteri ornalas­qan 9 qabatty ǵı­marattyń kire berisinde jasalǵan.

Jarylystyń kúshti bolǵany sonshalyqty, kórshiles or­nalasqan turǵyn úılerge de aıtarlyqtaı zııan kelgen. Sırııa oppozısııasynyń derekterine qaraǵanda, lańkestik qur­ban­dyqtarynyń sany 50 adamnan asady. Kóz jumǵandar arasynda barlaý ofıserlerimen qatar, kóshede ketip bara jatqan qarapaıym adamdar da bar kórinedi.

 

ÚKIMET JASAQTAÝ MANDATYNAN BAS TARTTY

Grekııanyń «Sırıza» dep atalatyn solshyl radıkaldy koalısııasynyń serkesi Aleksıs Sıpras úkimet jasaqtaý mandatynan bas tartty. «Sırıza» múshe­lerimen kezdesýi kezinde ol biz solshyl úkimet qurý týraly armanymyzdy júzege asyra almadyq dep málimdegen.

Sóıtip, Aleksıs Sıpras keshe prezıdentten úkimet jasaqtaý týraly alǵan mandatyn qaıtaryp berdi. Al Grekııada 6 mamyr kúni ótken kezekten tys parlament saılaýynda «Sırıza» ekinshi oryn alǵan bolatyn. Al eń kóp mandatty ońshylsentrıstik «Jańa demokratııa» partııasy alǵan edi. Bul partııanyń serkesi Antonıs Samaras  ta úkimet jasaqtaý mandatynan bas tartqan bolatyn. Eger 17 mamyrǵa deıin jańa úkimet jasaqtalmasa, elde jańa saılaý jarııalanady.

 

IRANDA AGENTTIK QYZMETKERI QAZA TAPTY

Iranda avtomobıl apaty saldarynan Atom energetıkasy jónindegi ha­lyq­aralyq agenttiktiń (MAGATE) qyzmet­keri qaza tapty. Oqıǵa Arak  qalasy mańynda tirkelgen. Kólikte sondaı-aq atom energetıkasy jónindegi taǵy bir sarapshy  bolypty.

Ońtústikkoreıalyq maman Ok Seok Se  qaza tapsa, onyń birge kele jatqan áriptesi jaraqat alǵan. Arak qalasynda ıadrolyq zertteý júrgiziletin keshen ornalasqan eken. Iran basshylyǵy Arakta ornalasqan reaktor tek beıbit maqsatta paıdalanylatynyn málimdep otyr. MAGATE bolsa, qol­danylǵan otyn ıadrolyq oqtumsyqtar jasaý úshin qaıta óńdelýi múmkin dep alańdaýshylyq bildirdi.

 

ÁZERBAIJANDARDYŃ AShÝ-YZASYN TÝǴYZDY

9 mamyr kúni tanylmaǵan Taýly Qarabaq respýb­lı­kasynyń astanasy Stepanakert qalasynda áskerı parad bolyp ótken edi. Buǵan Ázerbaıjan tarapy óziniń na­razylyǵyn bildirdi. Mundaı narazy kóńil-kúıge paradqa Armenııa prezıdenti Serj Sargsıannyń qatysýy sebep boldy.

Ázerbaıjan syrtqy ister mınıstrligi ótken oqıǵany arandatýshylyq áreket dep esepteıtinin málimdedi. «Mundaı destrýktıvti ustanym armıan jaǵynyń kelissózderdi kons­trýktıvti júrgizýge daıyn emes ekenin aıǵaqtaıdy», deıdi mınıstrliktiń baspasóz hatshysy Elman Abdýllaev. Sharaǵa sondaı-aq Armenııanyń burynǵy prezıdenti Robert Kocharıan men tanylmaǵan TQR prezıdenti Bako Saakıan da qatysqan.

 

ALǴASh RET BIR JYNYSTY NEKENI QOLDADY

AQSh prezıdenti Barak Obama kóp­shilik aldynda alǵash ret bir jynysty nekeler qurýǵa ruqsat berý kerek degen pikirin bildirdi. Bul málimdemesin ol AVS telearnasy arqyly jasady. Sonymen bir mezgilde, prezıdent bul ózi­niń jeke pikiri ekenin, bul másele zańnamalyq turǵyda shtat­tar deńgeıinde sheshilýi tıis ekenin atap kórsetti. 

Obama, sonymen qatar, qyzdary Malııa men Sashanyń bir jynysty jup tárbıelep otyrǵan dostary bar ekenin kóldeneń tartqan. Munyń  aldynda AQSh-tyń vıse-prezı­denti Djo Baıden de bir jynysty nekelerge qarsylyǵy joq ekenin habarlaǵan bolatyn. Bul AQSh prezıdentiniń Qurama Shtattarda aldaǵy kúzde ótetin saılaý qarsańynda óz jaǵyna adamdar tartý maqsatyndaǵy qadamy bolýy da yqtımal.

Qysqa qaıyryp aıtqanda:

Fılıppındegi Býtýan qalasyndaǵy dúkende bolǵan órt saldarynan 17 adam kóz jumdy. О́rt dúkenniń úsh qabatty ǵımara­tyn­da erteńgisin tutanǵan. Qaza tapqandardyń kópshiligi jo­ǵar­ǵy qabatta uıyqtap jatqan dúken qyzmetshileri eken.

Mysyrda 2011 jyldyń jeltoqsanynda bılikke qarsy narazylyq aksııalaryna qatysqan 293 oppozısııashy sottalatyn bolady. Olarǵa  bılikke qarsylyq bildirdi, memlekettik menshikke zalal keltirdi jáne zańsyz qarý-jaraq ustap júrdi degen aıyptar taǵylyp otyr.

Reseı Federasııasynyń tergeý komıteti Indonezııada Sukhoi Superjet-100 ushaǵynyń  apatqa ushyraýyna baılanysty qyl­mys­tyq is qozǵady. Túrli derek boıynsha ushaq bortynda 45 pen 48 aralyǵynda adam bolǵan. Olardyń bári de qaza taýypty.

Ýkraınanyń Lvov qalasyndaǵy Lychakov aýdandyq soty 9 ma­myr kúni Dańq bıiginde (Lvovtaǵy soǵys memorıaly) qyzyl tý kótergen kompartııa ókili Iýrıı Tkachenkony aqtap shy­ǵardy. Ol áýelde «qoǵamdyq tártipti buzdy» dep aıyptalyp, qamaýǵa alynǵan bolatyn.

Internet materıaldary negizinde ázirlendi.