Almaty oblysy boıynsha Tótenshe jaǵdaı departamenti Balpyq bı aýylyndaǵy №32 órt sóndirý bóliminiń qyzmetkeri Nurjan Sapash 15 jastaǵy oqýshyny tosyn ajaldan arashalap qaldy.
Oqıǵa 6 naýryzda bolǵan eken. Baspana ıelerine órt qaýisizdigi jaıly túsindirý jumystaryn júrgizý úshin kóshe aralaýǵa shyqqan serjant Nurjan Sapash kezekti úıdiń esigin qaqqanda, kómek suraǵan bozbalanyń daýysyn estıdi. Bul kezde úıde 16 jastaǵy Erasyl men inisi Temirlan ekeýi ǵana bar edi. Qaqpa syrtynan estilgen dybystan oıanǵan estııar Erasyl inisine dem jetpeı, denesi qurysyp jatqanyn kóredi. О́z betinshe kómek kórsete almaǵan ol janushyra aıqaılap jiberedi. Osy kezde úıge kirgen órt sóndirýshi Temirlandy kóre sala, birden alǵashqy medısınalyq kómek kórsetýge kirisken. «Jedel járdem» kelgenge deıin Nurjan demi tarylǵan jasóspirimdi qutqarýǵa kúsh saldy. Balanyń «qurysý sındromymen» aýyratynyn estigen soń, onyń tilin jutýyna jol bermeı, tynys alýyna janyn saldy. Dárigerler de jyldam jetip, Temirlanǵa ekpe salyp kómek kórsetken.
- Sol kúni kezekshilikte bolǵan dáriger endi 1 mınýt keshikkende balamyz qurysý men aýa jetispeýinen ólip ketýi múmkin ekenin aıtty. Serjant bizdiń úıge der kezinde kelgen eken. Ulymyzdyń qutqarýshysyna alǵysymyz sheksiz. О́z isin adal atqaratyn Nurjan sııaqty jastardyń isin qoǵam bilip, dáriptep júrsinshi, - deıdi Balpyq bı aýylynyń turǵyny Jeksembaevtar otbasy.
Qalmahanbet MUQAMETQALI,
«Egemen Qazaqstan»
Almaty oblysy