Ásirese áleýmettik jaǵdaıy tómen, az qamtylǵan otbasylarǵa baspananyń basty muń ekeni belgili. Búgingi tańda azamattarǵa memleket tarapynan turǵyn úı alýǵa edáýir jeńildik jasalyp otyr desek te, áli de kóptegen jandardyń úı-kúısiz júrgeni shyn.
Kóp balaly, aılyǵy shaılyǵyna jetpeıtin otbasylar alǵashqy jarnasyn, odan keıin aı saıynǵy nesıesin tólep, baspanaly bolýǵa da qaýqarsyz. Sondyqtan da qazirgi kezde kóp balaly jáne az qamtylǵan otbasylardyń áleýmettik máselesin ońtaılandyrý ózekti bolyp tur. Al Jambyl óńirinde jaǵdaıy tómen jandarǵa arnalǵan jataqhana salynady degen jańalyqtyń da talaı júrekke jylý, talaı kóńilge úmit uıalatqany anyq.
Jýyrda Jambyl oblysynyń ákimi Asqar Myrzahmetov jergilikti kóp balaly analarmen kezdesip, olardyń áleýmettik máselesin sheshý maqsatynda óńirde 10 jataqhana salynatynyn aıtqan edi. Kóktem shyǵyp kún jylyna salysymen, kóp balaly otbasylardyń kópten kútken úmiti aqtalǵandaı. Taraz qalasy №5 «Qarasý» shaǵyn aýdanynan kóp balaly otbasylarǵa arnalǵan 4 kópqabatty áleýmettik jataqhana salynatyn boldy. Jambyl oblystyq qurylys basqarmasynyń basshysy Jaıyqbaı Shaldarovtyń aıtýynsha, jataqhanada barlyǵy 180 páter bolady dep josparlanýda. Atalǵan jobanyń quny 812 mıllıon teńgege aınalady eken. Qurylystyń jalpy aýmaǵy 8 100 sharshy metrdi qurasa, páterdiń bir sharshy metriniń quny 100,2 myń teńge bolady.
Aıta ketý kerek, jańa salynatyn turǵyn úıdiń jataqhana degen aty bolǵanymen, zaty zamanaýı talapqa saı kádimgi páter. Alǵashqy 4 birdeı jataqhana salynatyn atalǵan aýmaqta ınfraqurylym máselesi sheshilgen. Al jataqhananyń ishki qurylysy kádimgi eki bólmeli páterlerden turady. Ondaǵy bir páterdiń jalpy aýdany 35-40 sharshy metrdi quraıdy. Ár páterde zal jáne jatyn bólmeler, sondaı-aq ár páterdiń as úıi, ájethanasy men jýynatyn bólmesi de josparlanǵan. Jospar boıynsha jobanyń barlyq qujattary aldaǵy úsh aıda daıyndalyp, qurylys jumystary aǵymdaǵy jyldyń maýsym aıynda bastalyp, bıylǵy 1 jeltoqsanǵa deıin aıaqtalýy tıis.
Atalǵan máselege oraı ótken jıynda da ákim qujattardy daıyndaý men qurylys jumystaryn barynsha jyldamdatyp, aǵymdaǵy jyldyń qazan aıyna deıin jataqhanany tapsyrý keregin basa aıtqan edi. Eger ákimniń qoıǵan talaby oryndalyp, tıisti mekemeler kúsh salsa, jyl aıaqtalmaı jatyp-aq talaı azamattyń armany oryndalady. Sondaı-aq óńirde turǵyn úı kezeginde turǵan 23 myń adam bar eken. Endi olardyń máselesin sheshý úshin óńirdegi turǵyn úı qurylysynyń kólemin barynsha arttyrý qajettigine kóńil bólinip, bul baǵyttaǵy jumystar kúsheıip keledi.
Máselen, 7 balanyń anasy Aınur Serikbaeva otbasymen Taraz qalasynda páter jaldap turady. T.Rysqulov aýdanynan kelgen otbasy 7 jyl buryn páter kezegine turǵan. Bir qıyny, az qamtylǵan otbasynda dúnıege kelgen egiz balalardyń syńary búginde 6 jasqa kelse de, ózdiginen júre almaıdy. О́zdiginen sóıleı de almaıtyn balany Aınur kúıeýi ekeýi jumys istemeı úıinde otyryp qaraıdy eken. Osy sııaqty taǵy qanshama áleýmettik jaǵdaıy tómen otbasy bar. Bir jaqsysy, aldaǵy ýaqytta óńirde osyndaı az qamtylǵan jáne kóp balaly otbasylardyń máselesin sheshý úshin sharalar qolǵa alynýda.
«Bınom» jaýapkershiligi shekteýli seriktestiginiń basshysy Serik Oljabekov uıym tarapynan bıyl joba quny 203 mıllıon teńgeden bolatyn árqaısysy 45 páterli eki kópqabatty áleýmettik turǵyn úı salýdy josparlap otyrǵanyn aıtty. Sonymen qatar seriktestik basshysy eger qoldaý bolsa, bul baǵytta aýqymdy qurylys júrgizýge múmkinshilikteri jetetinin de málimdedi. Bul oraıda oblys ákimdigi turǵyn úı máselesin sheshýde merdigerlerdiń múmkinshiligi men áleýetin paıdalanýdyń qos tarapqa da tıimdiligin eskere otyryp, naqty jumystardy bastady. Sondaı-aq Taraz jáne Shý, Jańatas, Qarataý qalalaryndaǵy turǵyn úı kezeginde turǵan az qamtylǵan otbasylardyń jataqhana máselesin sheshý joldary saralanyp, jańa ǵımarat salý nemese bos nysandardy satyp alyp yńǵaılastyrý sharalary da jan-jaqty talqylanýda.
Hamıt ESAMAN,
«Egemen Qazaqstan»
Jambyl oblysy