Bul qandaı batpan quıryq dersiz. Biraq rasy sol. Qarmaqshy aýdanyndaǵy jas kásipker ózi turatyn Dúr Ońǵar aýylyndaǵy áleýmettik jaǵynan az qorǵalǵan 12 otbasyny tegin sútpen qamtyp otyr.
Talapty hám tabandy adamǵa alynbaıtyn qamal joq. Danııar Shaıanbaev «Zhas Rroject» jobasy jaıynda ınternetten kórip, kásipkerlikti bastaýǵa úlken múmkindik ekendigin túsindi. Sóıtti de, aýdandyq «Jastar resýrsy» ortalyǵyna baryp, trenıngterge qatysty. О́ziniń jańa jobasyn usynyp, 1 mln teńge qaıtarymsyz grant jeńip aldy.
Aıaq astynan mıllıoner bolyp shyǵa kelgen Danııar keıbir qurdastaryndaı qyzyq qýyp ketpeı, úsh bas saýyn sıyr satyp alady. Sútti úsh sıyr baǵa bilgenge ájeptáýir baılyq. Sútten qaımaq aıyrǵannan bólek, aıran uıytyp, qurt, irimshik, sary maı alǵan Danııardyń jumysy júrip sala berdi. Bıznes jobadaǵy bastamasyna oraı 12 otbasynyń azyǵyn aıyrǵan jas jigit bul jetistigine toqmeıilsip otyrǵan joq. Qasyna aýyldaǵy jumyssyz júrgen úsh jasóspirimdi tartyp, aılyq tólep otyrǵan Danııardyń endigi mejesi Jastar jylyna oraı beriletin 3 mln teńgelik grantty jeńip alý bolyp otyr. Bir mıllıonmen-aq birtalaı áleýmettik máselelerdi sheshken jigit óziniń keleshekte myqty kásipker bolaryna senedi.
Qarmaqshy aýdandyq Jastar resýrstyq ortalyǵynyń dırektory Ádil Ibrahım «Zhas Rroject» jobasy boıynsha aýdanda 30-dan asa joba usynylǵanyn aıtady. Sonyń ishinde jumyssyz júrgen 13 jas qaıtarymsyz grant utyp alǵan.
Memlekettik kómektiń qoltyqtan myqtap demerin sezingen jastar bıznes nesıeler men bıznes granttardyń oqytý kýrstaryna kóptep jazyla bastaǵan.
«Zhas Rroject» – jastar úshin úlken múmkindik. Elbasy «Nur Otan» sezinde memlekettik qoldaýlardyń áli de tıimdi paıdalanylmaı jatqany jaıly aıtqan-dy. Rasynda, mıllıardtaǵan qarjynyń izi joq saǵym jobalarǵa salynyp, talan-taraj bolýy jıilep ketti. Sondaı «sý aıaǵy qurdym» jobalardan góri az ǵana aqshamen úlken nátıjege jetken Danııar sııaqty jastarǵa qoldaý kórsetilgeni áldeqaıda tıimdi ekeni sózsiz.
Baqtııar TAIJAN,
«Egemen Qazaqstan»
Qyzylorda oblysy