Bul jóninde Qostanaı oblysyna kelgen Fransııanyń Qazaqstandaǵy elshisi Fılıpp Martıne bastaǵan fransýz delegasııasy men óńir basshysy Arhımed Muhambetovtyń kezdesýinde aıtyldy. Elshi janyna fransııalyq eliniń áleýetti ınvestorlaryn, ıaǵnı fransııalyq jáne birikken iri kompanııalar basshylaryn erte kelipti.
Olarmen kezdesýde oblys ákimi Arhımed Muhambetov oblystyń syrtqy ekonmıkalyq baılanysyn qysqasha baıandap berdi. Qostanaı búginde álemniń 90 elimen ekonomıkalyq baılanys jasaıdy. Sonyń ishinde óndirgen ónimin negizinen Reseıge, Qytaıǵa, Iranǵa, Aýǵanstanǵa, О́zbekstanǵa jáne taǵy basqa elderge artady. Oblystyń syrtqy taýar aınalymy 2 mlrd.867 mln dollardy quraıdy. Al sonyń ishinde Fransııamen aradaǵy saýda kólemi 2 mln dollardan asady.
«Biz Fransııa ınvestorlarynyń qandaı usynysyn da qaraýǵa daıarmyz. О́zimizdegi Indýstrııalyq aımaqqa ornalasý qyzyqtyrsa, ony da, oblystyń basqa óńirine qarjy salǵysy kelse, ony da qoldaımyz» dedi Arhımed Begejanuly.
О́z kezeginde Fransýz elshisi Fılıpp Martıne Qostanaıda fransýz ortalyǵynyń birneshe jyldan beri jumys isteıtinin, sonyń arqasynda eki el arasyndaǵy bilim jáne mádenı baılanystardyń damyp otyrǵanyn aıtty. Degenmen elshiniń bul jolǵy sapardaǵy usynysy ekonomıkaǵa qatysty boldy. 2005 jyly Reseıdiń Lıpesk qalasynda irgetasyn qalaǵan «Otrada» kompanııasy Qostanaıda shoshqa sharýashylyǵyn damytqysy keletin usynysyn aıtty. Jobanyń halyqaralyq sıpaty bolady, onyń aksıonerleri Fransýzdar men Reseı bolyp tabylady, bul iste Danııa, О́zbekstan, Ýkraına áriptesteri sanalady eken. Osy jobasy úshin fransýzdardyń tańdaýy Qazaqstannyń astyqty óńiri Qostanaıǵa túsken syńaıly. Jobanyń iske asýy qalaı bolatynyn ýaqyt kórsetedi. Ázirshe delegasııa oblys óńirin aralap júr.
Názıra JÁRIMBET,
«Egemen Qazaqstan»
Qostanaı