«Jaısań avto» shekaralyq baqylaý bólimshesinde 41 jastaǵy reseılik ustaldy. Ol «GAZ 2834» avtokóliginde Reseıge qaraı jalpy salmaǵy 1000 kg avtomobılderdiń qosalqy bólshekterin zańsyz alyp ótpek bolǵan eken. Bul týraly QR UQK ShQ baspasóz qyzmeti habarlady.
«Aktilenip, Aqtóbe oblysy boıynsha Memlekettik kiris departamentine tapsyrylǵan zattardyń jalpy quny - 1 600 000 teńgeni qurady. Dál osy bekette Reseıge bet alǵan 30 jastaǵy qazaqstandyqtan velosıpedterge arnalǵan 300 dóńgelek pen 100 dana jyldamdyq aýystyrý mehanızmderi, onymen qurdas qazaqstandyq azamatshadan 1200 kg daqyldar, 1965 jylǵy reseılikten 70 kg ózen shaıandary tabylyp, MKD qyzmetkerlerine tapsyryldy», delingen habarlamada.
Osy otrıadtyń «Álimbet avto» bólimshesinde 29 jastaǵy qazaqstandyq Reseıge zańsyz áketip bara jatqan 8000 dana sharýashylyq sypyrtqylarymen ustaldy.