Parlament Senatynyń jalpy otyrysynda Halyqaralyq qatynastar, qorǵanys jáne qaýipsizdik turaqty komıtetiniń tóraǵasy saılandy.
«Bul komıtettiń tóraǵasy laýazymyna Muhtar Abraruly Qul-Muhammedtiń kandıdatýrasyn usynamyn. M. Abraruly belgili qoǵam jáne memleket qaıratkeri. «Nur Otan» partııasy Tóraǵasynyń birinshi orynbasary, Memlekettik hatshy, mınıstr, oblys ákimi bolyp asa jaýapty laýazymdardy abyroımen atqardy. Bilimdi, bilikti jáne tájirıbeli depýtat», - dedi Senat spıkeri Darıǵa Nazarbaeva.
Senatorlar Halyqaralyq qatynastar, qorǵanys jáne qaýipsizdik turaqty komıtetiniń tóraǵasy qyzmetine Muhtar Qul-Muhammedti saılaý týraly sheshimdi biraýyzdan qoldady.
«Búgingi kórsetken qoldaý men senim - bul men úshin úlken jaýapkershilik. Sondyqtan barlyq kúsh-jigerimdi osy senimdi aqtaýǵa jumsaıtyn bolamyn. Barshańyzǵa rahmet!», - dedi M. Qul-Muhammed.
M. Abraruly 1960 jyly 12 jeltoqsanda týǵan, qazaq, bilimi joǵary. S.M. Kırov atyndaǵy Qazaq memlekettik ýnıversıtetin bitirgen. Jýrnalıst, zań ǵylymdarynyń doktory, professor. QR Mádenıet, aqparat jáne qoǵamdyq kelisim mınıstri, QR Prezıdentiniń Keńesshisi, baspasóz hatshysy, QR Prezıdenti Ákimshiligi Basshysynyń orynbasary, Qyzylorda oblysynyń ákimi, «Nur Otan» partııasy Tóraǵasynyń birinshi orynbasary bolyp qyzmet atqardy. «Qurmet», «Parasat», III dárejeli «Barys» ordenderimen marapattalǵan.
Esterińizge sala keteıik, Halyqaralyq qatynastar, qorǵanys jáne qaýipsizdik turaqty komıtetiniń tóraǵasy qyzmetin Darıǵa Nazarbaeva atqarǵan edi. Bıylǵy 20 naýryz kúni Darıǵa Nazarbaeva QR Parlamenti Senatynyń spıkeri bolyp saılandy.