Jıyn «Atameken» QR UKP Basqarma Tóraǵasy Abylaı Myrzahmetov jáne QR Indýstrııa jáne ınfraqurylymdyq damý mınıstri Roman Sklıardyń tóraǵalyǵymen ótti. Jıynǵa beıne-konferensııa arqyly óńirdegi Jobalyq alqalardyń ókilderi qatysty.
Jıyndy ashqan Abylaı Myrzahmetov basym jobalardy jeńildikpen nesıeleý baǵdarlamasyna qatysý sharttary jaıynda kásipkerlerdi jan-jaqty aqparattandyrý qajettiligi týraly málimdedi.
«Bıznestiń barynsha osy jobaǵa atsalysýy biz úshin mańyzdy. Sondyqtan osy baǵytqa basymdyq berý qajet. «Atameken» óńirlerde baǵdarlamany túsindirý, nesıeleý mólsherlemeleri jáne sýbsıdııalaý sharttaryn talqylaý boıynsha jumysty bastap ketti. Elbasy tapsyrmasy boıynsha mundaı jumys alǵash ret júrgizilip jatyr, sondyqtan bızneske barynsha aqparatty jetkizý, al bıznestiń baǵdarlamaǵa belsendi atsalysýy óte mańyzdy», – dedi Abylaı Myrzahmetov.
Baǵdarlamany júzege asyrýda bıýrokratııaǵa jol bermeý kerek, dep málimdedi QR Indýstrııa jáne ınfraqurylymdyq damý mınıstri Roman Sklıar.
«Qazaqstandyq ındýstrııa damytý ınstıtýty» aksıonerlik qoǵamymen birlesip, biz jeńil ónerkásip taýarlary, jıhaz ónerkásibi jáne qurylys materıaldar óndirisi boıynsha Jol kartalaryn ázirledik. Qazir mashına jasaý salasynyń jol kartasyn qurý boıynsha jumys júrip jatyr. Ákimdikter men baǵdarlamaǵa qatysýshylar arasynda qandaı da bir túsinispeýshilik pen kedergilerge jol bermeı, olardy aldyn alyp, osy jobalyq alqada sheship otyrýdy usynamyn. Ol úshin biz bıznes ókilderimen apta saıyn kezdesip, kún tártibindegi barlyq máselelerdi tikeleı talqylaıtyn bolamyz. Jobalyq alqanyń sheshimi – sońǵy sheshim ekenin túsiný kerek», – dedi Roman Sklıar.
О́ńirlerdegi ókilderdiń habarlaýynsha, kásipkerler de Baǵdarlamaǵa qatysýǵa qyzyǵýshylyq tanytýda. Shyǵys Qazaqstan oblysynda agroónerkásiptik keshen, týrızm, jeńil ónerkásibi jáne jıhaz ónerkásibi salalarynan baǵdarlamaǵa qatysýǵa 24 kásiporyn ótinim berdi, 2 joba banktiń maquldaýyn ótip jatyr. Shymkentte Jobalyq alqanyń bir aptalyq jumysynyń nátıjesinde kásiporyndardan jalpy somasy 39 mlrd teńgege 39 ótinim kelip tústi. Onyń ishinde 26 ótinim jobany ázirleý kezeńinde, 4 joba bank qaraýyna jiberildi, 4 joba – bıznes-jospar qurý kezeńinde.
Esterińizge salsaq, oblys deńgeıindegi jobalyq alqalar О́ńirlik kásipkerler palatalary janynda ákimdikter, bankter, «Damý» qorynyń fılıaldary, bıznes-qoǵamdastyqtardyń qatysýymen jumys istep jatyr.
Baǵdarlamaǵa qatysýǵa nıet tanytqan kásiporyndar arasynda saýalnama júrgizý – Jobalyq alqa jumysynyń mańyzdy kezeńi bolmaq. Saýalnama bankter ótinishin maquldamaǵan kompanııalardy anyqtaýǵa jáne saladaǵy ózekti máselelerdi bilýge múmkindik beredi.
«Ár apta saıyn aqparatty jınaqtap, bıznespen talqylaıtyn bolamyz. Kásiporyndarǵa qoldanystaǵy baǵdarlamalar aıasynda qoldaý sharalaryn túsindiremiz. Jumys saparymen óńirlerge baryp, kásipkerlermen kezdestik. Bıznes ósip, keńeıgisi keledi, alaıda ekinshi deńgeıli bankterdiń kepildikke qatysty talaby áli de ózekti. Kásipkerlerdiń jobalary tolyq júzege asqansha barynsha súıemeldep otyrýǵa múmkindik te bar», – dedi «Qazaqstandyq ındýstrııa damytý ınstıtýty» AQ Basqarma tóraıymy Dana Júnisova.
Kásipkerler Baǵdarlamaǵa qatysty aqparatty, sondaı-aq qajetti keńesti О́ńirlik kásipkerler palatasy janynda qurylǵan Jobalyq alqadan alýyna bolady.
Esterińizge salsaq, bıyl Elbasynyń tapsyrmasymen halyq tutynatyn taýarlardy, sondaı-aq shıkizat jáne bastapqy óńdeý ónimder óndirisin qoldaýǵa Úkimetten 600 mlrd teńge bólindi. Atap aıtqanda, bul qarajat óńdeý ónerkásibi, agroónerkásip keshenin damytý men qoldaýǵa baǵyttalady.
Aıta ketelik, Baǵdarlama aıasynda daıyn ónim óndirisine ǵana emes, sondaı-aq qajetti shıkizat jáne bastapqy óndeý ónimderin shyǵarýǵa qoldaý kórsetiledi.
Qazirgi tańda Baǵdarlama jumysyna ekinshi deńgeıli 9 bank qosyldy. Qarjylandyrýǵa qol jetkizý úshin kásipker bankke ótinim jiberip, bıznes jobany baǵalaý jáne maquldaý prosedýralarynan ótip, «Damý» kásipkerlikti damytý qoryna júginýi qajet.