Kenshiler astanasynda «Úzdik dızaıner» atty baıqaý ótip, onda Reseı, О́zbekstan jáne Qazaqstannan kelgen dızaınerler ózderi tikken kıim-keshekteri men qoldan jasaǵan áshekeı zattaryn qazylar alqasynyń talqysyna usyndy.
– Qaraǵandyda Fashion ındýstrııasyn damytý kópten beri oıymda júrgen ıdeıa edi. Búginde bul salanyń mańyzdy ári qajet ekenine jurttyń da kózi jete bastady. Pikirlesterim men qoldaýshylarymnyń barlyǵyna qýanyshtymyn. Al atalǵan baıqaýdyń jańa deıgeıge shyqqany – biz tańdaǵan joldyń durystyǵyn kórsetedi, – deıdi joba avtorlarynyń biri Irına Nechaeva.
Baıqaýdaǵy áshekeıshiler saıysynda qaraǵandylyq Olga Sellerge teń keler eshkim bolmady. Qolóner sheberiniń kenshiler qalasynyń ereksheligin pash etetin toptamasynda tas kómir men tabıǵı gúlder úılesim taýyp, kózdiń jaýyn alatyn alýan túrli áshekeı buıymdaryna aınalǵan. Bas júldege ıe bolǵan jeńimpaz endi Máskeý qalasynda ótetin halyqaralyq baıqaýda baq synaıtyn bolady.
Olganyń negizgi mamandyǵy ekonomıst. Bezendirý dızaınymen tórt jyldan beri aınalysyp keledi.
– Barlyǵy hobbıden bastaldy. Men ózime jáne qurbylaryma arnalǵan aksessýarlar jasadym. Sodan keıin shaıyr ústine tabıǵı gúlderden áshekeı jasaý tehnologııasyn meńgerdim. Hobbıim kele-kele kásibime aınaldy. Qazir kolleksııalarmen jumys isteımin jáne ózimniń biregeı stılimdi jasaýǵa tyrysyp kelemin, – deıdi Olga Seller.
Al «Úzdik dızaıner» atalymy boıynsha bas júlde elordalyq sheber Kamılıa Súleımenovaǵa buıyrdy. Jeńimpazdyń kıiz óńdeý isine zamanaýı lep berip, ony jańa qyrynan tanyta bilgen sheberligi qazylar alqasynan joǵary baǵa aldy.
«Rýhanı jańǵyrý» baǵdarlamasy aıasynda ótken baıqaýdy qalalyq mádenıet jáne tilderdi damytý bóliminiń tapsyrysy boıynsha «Shańyraq elge ortaq» qoǵamdyq birlestigi uıymdastyrǵanyn jáne oǵan Nur Otan partııasynyń qalalyq fılıaly, Eýrazııalyq áıelder qaýymdastyǵy, Qaraǵandy oblysynyń jeńil ónerkásip komıtetiniń qoldaý kórsetkenin aıta ketken jón.
Qaırat ÁBILDA,
«Egemen Qazaqstan»
QARAǴANDY