29-31 naýryz aralyǵynda Almatydaǵy «Dostyq» sport kesheninde dańqty balýan, Alash jurtynyń maqtanyshy Dáýlet Turlyhanovtyń júldesi úshin grek-rım kúresinen respýblıkalyq týrnır ótedi.
Osymen 20 márte uıymdastyrylǵaly otyrǵan jasóspirimder arasyndaǵy aıtýly jarys arqyly talaı jas órender úlken sporttaǵy alǵashqy qadamdaryn jasady. Bul kúnderi elimizdiń beldi balýandaryna aınalyp otyrǵan sańlaqtardyń deni kezinde dál osy týrnırde baq synap, sheberlikterin shyndady. Bıylǵy dodada da kórermender respýblıkamyzdyń barlyq aımaǵynan jınalǵan talaı daryndy uldardyń ónerine tánti bolady dep oılaımyz.
Seýl men Barselona Olımpıadasynyń júldegeri, álem chempıony, Eýropa men Azııa birinshilikteri men Azııa oıyndarynyń jeńimpazy, álem kýbogynyń eki dúrkin ıegeri, KSRO-nyń jeti dúrkin chempıony, Azııa kúres federasııasynyń prezıdenti, UWW bıýro múshesi Dáýlet Turlyhanovtyń júldesi úshin ótetin osy jarysty tamashalaýǵa ózimizdiń ataqty sportshylarmen qatar shet memleketten de áıgili balýandar keledi dep kútilýde.
Ǵalym SÚLEIMEN,
«Egemen Qazaqstan»