О́tken jyly Shymkent qalasynda jumys kezinde 62 jazataıym oqıǵa oryn alyp, odan 72 adam zardap shekken. Zardap shekkenderdiń 13-i qaıtys bolǵan. 5 toptyq jazataıym oqıǵa nátıjesinde 8 adam qaıtys bolǵan. Onyń ishinde 47 jazataıym oqıǵa Túrkistan oblysynyń memlekettik eńbek ınspektorlary tarapynan júrgizilse, 15-i Shymkent qalasynyń memlekettik eńbek ınspektorlary tarapynan qaralǵan.
Jazataıym oqıǵalardyń týyndaýyna jol qozǵalysy erejelerin saqtamaý, tehnologııalyq prosesterdiń buzylýy, jeke qorǵaný quraldaryn paıdalanbaý jəne belgilengen eńbek rejıminiń buzylýy sebep bolǵan.
Bul týraly qalalyq aqparattyq-kommýnıkasııalyq ortalyqta ótken baspasóz máslıhatynda Shymkent qalasynyń eńbek ınspeksııasy jáne kóshi qon basqarmasynyń basshysy Baýyrjan Qaljanov aıtyp ótti.
Basqarma basshysynyń aıtýynsha, ótken jyldyń qyrkúıek aıynan bastap jyl sońyna deıin basqarmaǵa jeke azamattar men mekemelerden 359 aryz-shaǵym tússe, bıyl jyl basynan 1 naýryzǵa deıingi bul derek 238-ge jetken. Sonymen qatar, eńbek zańnamasynyń buzylýy boıynsha 4,1 mıllıon teńge kóleminde 34 ákimshilik aıyppul salynǵan. 2019 jyldyń eki aıynyń qorytyndysy boıynsha 238 jeke jáne zańdy tulǵalardyń aryz-shaǵymdary qaralǵan. Qaralǵan aryz-shaǵymdar negizinde, mekemeler men kásiporyndarda barlyǵy 57 tekserý júrgizilip, nátıjesinde, 40 zań buzýshylyq anyqtalyp, anyqtalǵan buzýshylyqtardyń negizinde 24 nusqama berilgen.
Bıyl «Qaýipsiz eńbek» aqparattyq naýqanyn ótkizý jóninde daıyndalǵan jol kartasy negizinde basqarma tarapynan is-sharalar úsh baǵytta júrgiziledi. «Aqparattyq naýqan ótkizýdegi basty maqsat óndiristik jaraqattaný men zııandy eńbek jaǵdaıyn azaıtý, eńbekti qorǵaý salasynda aldyn alý mádenıetin kóterý», deıdi qalanyń bas memlekettik eńbek ınspektory.
Atalǵan jıynda talqyǵa túsken taqyryptyń biri kisi aqysyn jemeý jóninde boldy. Basqarma taratqan málimetke súıensek, Shymkentte jumyskerlerdiń jalaqysy úshin 6 kásiporyn 27 mln teńge qaryz bolǵan. Tipti, ótken jyly bul kórsetkish 192,8 mln teńgeni quraǵan. Osy oraıda basqarma qyzmetkerleri jumys berýshilerdi de, jumysshylardy da kez-kelgen jumysqa kelisim-shart negizinde kirisýge, tipti synaq merzimin de qujat negizinde zańdastyrýǵa keńes berdi.
Shymkent qalasynda shetelden kelgen qandastar óte kóp. Olardyń atamekenge oralyp, jumysqa turýyna kóptegen kedergiler týyndaýda. Sonyń ishinde qujat rásimdeýde kezdesetin máselelerdy joıý úshin basqarma tarapynan birqatar túsindirý jumystary júrgizilýde.
«Qazaqstan Respýblıkasynyń azamattyǵyn alyp úlgermegen qandastar úshin «Oralman» statýsy 1 jylǵa ǵana beriledi. Osy ýaqytt aralyǵynda azamattyq alýǵa qujat rásimdep úlgermegender úshin taǵy 6 aı qosymsha ýaqyt beriledi. О́kinishke oraı, osy ýaqytty da paıdalanbaǵan azamattar bar. Sondyqtan, osy azamattarǵa 2019 jyldyń 31 jeltoqsanyna deıin taǵy da qosymsha ýaqyt qaralyp otyr. Osyny eskerip, qujat rásimdeý jumystaryn erterek aıaqtaý qajet», – deıdi basqarma basshysy.
Aıta keterligi, QR Eńbek jáne halyqty áleýmettik qorǵaý mınıstrligi 2019 jyl – Eńbek qaýipsizdigi jáne eńbekti qorǵaý jyly dep jarııalady. Mınıstrlik bekitken Jol kartasy aıasynda óńirimizde úsh jaqty komıssııanyń kelisimimen 2019-2021 jyldarǵa arnalǵan keshendi jol kartasy əzirlengen. Aldaǵy ýaqytta ótetin sharalar osy baǵyttar boıynsha júrgizilip, azamattardyń eńbek quqyǵy óz deńgeıinde qorǵalady deıdi sala mamandary.
Nurshat TО́KEN,
«Egemen Qazaqstan»
Shymkent