Sáýlet, qala qurylysy jáne jer qatynastary basqarmasy jańa keńsesin tanystyrdy. Bul týraly Nur-Sultan qalasy ákimdiginiń baspasóz qyzmeti habarlady.
Aqpan aıynan bastap sáýlet, qala qurylysy jáne jer basqarmasy Mámbetov kóshesi, 24 mekenjaıy boıynsha ornalasqan «Affarı» bıznes-ortalyǵyna kóshken bolatyn. Basqarma qyzmetkerleri open space formatynda jumys isteıdi. Osylaısha, jergilikti atqarýshy organdar azamattarmen ózara is-qımyldyń jańa formatyna kóshti. Jańa keńsede kelýshilerdi qabyldaý úshin zamanaýı resepshn, ǵımarattyń perımetri men holly boıynsha beınebaqylaý qarastyrylǵan, qyzmetkerler men kelýshilerdiń derekterin esepke alý úshin qoljetimdilikti baqylaý júıesi bar.
Sonymen qatar, basqarmamen memlekettik qyzmetterdi avtomattandyrý boıynsha jumystar júrgizilýde.
Búgingi tańda memlekettik organ 22 memlekettik qyzmet kórsetýde. Buǵan deıin bul jerde elektrondyq nusqada 2% memlekettik qyzmet kórsetildi, búginde elektrondyq formatqa memlekettik qyzmettiń 39% kóshirildi. Bıyl qyzmettiń 80% elektrondy túrge aýysýy qajet.
«Ashyqtyq - bul sybaılas jemqorlyqqa jol bermeý sharttarynyń biri. Elektrondyq format qyzmet alýshylarmen baılanystyń tómendegenin kórsetedi. Bizde sybaılas jemqorlyqqa qarsy mádenıetti, ımmýnıtetti, sybaılas jemqorlyqqa nóldik tózimdilikti qalyptastyrý júrip jatyr. Bul parallel bolýy kerek. Keńseler de ashylady, memlekettik qyzmetterdi sıfrlandyrýmen qatar, tıisinshe, sana ózgerýi tıis. Sol kezde qoǵam da úlken rahmet aıtady», - dedi QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Alık Shpekbaev.