О́ńirdegi quqyq qorǵaý, tabıǵat qorǵaý organdarynyń jáne shekara qyzmetiniń 11 qaıyǵy men 17 shaǵyn kemesi Jaıyq ózenindegi sherýge qatysty. Balyqshy yqsham aýdanynan ózenniń Kaspıı teńizine quıar jerine deıingi aralyq sý kóligine toldy. Bıyl «Bekire-2019» balyq qorǵaý aksııasy osylaısha erekshe bastaldy.
Oblystyq orman sharýashylyǵy jáne janýarlar dúnıesi aýmaqtyq ınspeksııasynyń basshysy Danııar Baımaǵambetov: «Teńiz jaǵalaýy men sý aıdyndarynda, Jaıyq, Qıǵash ózenderiniń aǵyndarynda, jalpy brokonerlik derekter bolýy yqtımal jerlerde shoǵyrlanǵan stasıonarlyq, mobıldi bólimsheler men jyljymaly joldar toby uıymdastyryldy. Naýqan barysynda 16 beket qoıylyp, 500-den astam adam qyzmet etedi»,- deıdi.
Atyraý, Mańǵystaý, Batys Qazaqstan oblystarynda jyl saıyn dástúrli túrde ótetin naýqan 31 mamyrǵa deıin jalǵasady. Jaıyq-Kaspıı basseıninde baǵaly bekire balyqtardyń túrlerin saqtaýǵa baǵyttalǵan shara aıasynda jyl saıyn júzdegen zań buzýshylyq derekteri anyqtalyp, shara qoldanylady.
ATYRAÝ