Beısenbi, 23 aqpan 2012 8:13
Jurttyń bári Jańa jyl qarsańyndaǵy qarbalas qýanyshtyń jeteginde bolǵanymen, B-nyń qabaǵy qatyńqy. Aınaladaǵy jaınaǵan ózgeris, qol bulǵaǵan qaraǵaı-qaıyń, kúmis kún sýyt júristi jigitti selt etkizer emes. Jasy otyz jetiden asqan onyń bar oıy endi eki kúnnen keıin bastalatyn Jańa jyldy qyzyl jyltyraq dýmanmen dúrkiretip qarsy alý. Biraq, ol úshin qyrýar qarjy-qarajat kerek. Ony qaıdan tappaq?
Beısenbi, 23 aqpan 2012 8:13
Jurttyń bári Jańa jyl qarsańyndaǵy qarbalas qýanyshtyń jeteginde bolǵanymen, B-nyń qabaǵy qatyńqy. Aınaladaǵy jaınaǵan ózgeris, qol bulǵaǵan qaraǵaı-qaıyń, kúmis kún sýyt júristi jigitti selt etkizer emes. Jasy otyz jetiden asqan onyń bar oıy endi eki kúnnen keıin bastalatyn Jańa jyldy qyzyl jyltyraq dýmanmen dúrkiretip qarsy alý. Biraq, ol úshin qyrýar qarjy-qarajat kerek. Ony qaıdan tappaq?
Sodan ol bopsalaýdyń alǵashqy jolyn «Imperıal M» kazınosynan bastamaq boldy. Onyń da ózindik sebebi bar edi. B. mundaı mekemelerdiń tabaldyryǵyn on jyl boıy tozdyrǵan tájirıbeli oıynshy. Biraq, qumar oıynnan shekesi shylqyǵany da shamaly. Astana qalasyndaǵy Saryarqa aýdandyq sotynyń úkimimen, Qylmystyq Kodekstiń 103-babynyń 3-bólimimen aıypty dep tanylyp, 2003 jyly 5 jylǵa bas erkinen aıyrylǵan. Áıtkenmen, osy úkimniń teń jartysyn ótegennen keıin shartty túrde merziminen buryn bosatyldy. Onyń ústine, «Imperıaldyń» bas menedjeri A-menen kezinde Astana qalasyndaǵy bıznes salasynda áriptes bolǵany bar. Endi sodan qaryz suramaq, «berse jolynan, bermese qolynan».
Sondyqtan, janyna Aslan, Erjan atalatyn jandaıshaptaryn ertip alyp, batyldyq úshin Býrabaıǵa jetkenshe eki jarym shyny araqty bosatyp tastaıdy.
Obaly neshik, A. eski dosyn esik aldynan qushaq jaıa qarsy alyp, meıramhana tórine ozdyrdy. Astanalyq qonaq eki-úsh rıýmkadan keıin nildeı buzylsyn. Aldyn-ala top quryp jasaǵan josparynyń býymen ári araqty aýzyna almaı qoıǵan kazınoshynyń qylyǵy zyǵyrdanyna tıgen B. tez arada qaryzǵa 100000 teńge nemese 500 AQSh dollaryn taýyp berýin talap etedi. Bas menedjer ondaı aqshanyń joqtyǵyn, bar bolǵannyń ózinde quryltaıshylardyń kelisimi kerektigin aıtady. Ashýǵa býlyqqan B. munda jaıdan-jaı kelmegenin, muny qolpashtaıtyn qylmys áleminiń serkeleri barlyǵyn jetkizip qoqılanady. Anaý miz baqpaǵan soń, A-ny shalt qımylmen bas-kózine qaramaı soqqyǵa jyǵyp salsyn. Oǵan janyndaǵy baýkespeler qosylyp, áp-sátte kazınoshynyń qan josasyn shyǵarady. Oıynda eshteńe joq bas menedjerdiń «bizge bóget jasamańdar» degen ámiri boıynsha, kúzetshiler men qyzmetshiler qurmetti qonaqtar dastarqanyna bas suǵa qoımaǵan.
Kózi qaraýytqan B. qanǵa malynǵan dosyna endi tipti qatań talap qoıdy. A. nesıe emes, qaryz emes, júz myń teńgeni qolma-qol taýyp berip, esik aldynda qańtarýly turǵan «Toıoto Land-Krýzer» djıpin munyń atyna resimdeýi qajet. Osy kezdegi jantalas ústinde kazınoshy bopsalaýshylardan qashyp qutylýdyń sátsiz talpynysyn jasaıdy. Taǵy da ur da soq, aıaýsyz tepki. «О́ı, bosqa ýaqyt ótkizgenshe mynany syrtqa shyǵaryp, kózin qurtaıyq» degen nıetpen qanypezerler bas menedjerdi súıretip as daıyndaıtyn bólmege alyp keledi. Osynda bet-aýzyn qan jýǵan kazınoshyny jýyndyryp, dalaǵa dyryldatyp alyp shyǵady. Jendetterdiń qolynda pyshaq. Kimde-kim jaqyndasa A-nyń keńirdegin qıyp túsirmek. Dalada da uryp-soǵý, tepkileý jalǵasty. Osy kezde qyzmetshi qyzdardyń biri dabyl qońyraýyn basyp úlgergen. Kúzetshiler lap qoıdy. Bas jendet ustalyp, qalǵan ekeýi izim-qaıym joǵalǵan. Bul kezde polıseıler de kelip jetken. «Imperıaldyń» bas menedjeri san alýan jaraqatpen aýrýhanaǵa jetkizildi. Odan keıin aılap azapty emdelý, uzan-sonar tergeý, tekseris amaldary júrgizildi. Onshaqty sot-medısına saraptamasy jasalyp, otyzdan astam adam kýálikke tartyldy…
Jýyrda Býrabaı aýdandyq sotynyń tóraǵasy Samalbek Muhtarovtyń tóraǵalyǵymen sot prosesi aıaqtalyp, B. Qylmystyq Kodekstiń 181-baby, 2-bóliminiń «a», «b» tarmaqtarymen 4 jyl 8 aı merzimge bas erkinen aıyrylyp, A-nyń esebine moraldyq nuqsan túrinde 100000 teńge óndirip alýǵa úkim shyǵaryldy.
Baqbergen AMALBEK,
Aqmola oblysy,
Býrabaı aýdany.