Áriptestik áleýeti arta beredi

Memleket basshysy resmı sapary aıasynda Reseı Federasııasy Federaldyq Jınalysy Federasııa Keńesinde bolyp, Keńes tóraıymy Valentına Matvıenkomen kezdesti, sondaı-aq Qurmetti qonaqtar kitabyna qoltańba qaldyrdy.

Kezdesý barysynda Qasym-Jomart Toqaev Reseıge alǵashqy sheteldik saparynyń sımvoldyq máni zor ekenin aıtyp, bul ózara qurmet pen senimge negizdelgen ekijaqty strategııalyq seriktestiktiń joǵary deń­geıin aıǵaqtaıtynyn atap ótti.

– Qazaqstannyń jańa Prezıdenti retindegi meniń mindetim – elderimiz arasyndaǵy odaqtastyq qarym-qatynastyń da­mýyna mol eńbek sińirgen Elbasy Nursultan Nazarbaev strategııasynyń sa­baq­tastyǵyn qamtamasyz etý, – dedi Memle­ket basshysy.

Qasym-Jomart Toqaev Valentına Matvıenkonyń TMD Parlamentaralyq Assambleıasynyń tóraǵasy laýazymyndaǵy qyzmetin joǵary baǵalap, Federasııa Keńesiniń spıkerine ekijaqty parlamenttik baılanystardy nyǵaıtý jónindegi birlesken jumystar men halyqaralyq qurylymdar aıasyndaǵy jemisti yntymaqtastyq úshin rızashylyq bildirdi.

Sonymen qatar Memleket basshysy eki eldiń ıntegrasııalyq kún tártibi aıasynda ózara is-qımyldardy keńeıtý máselelerine arnaıy toqtaldy.

– 29 mamyrda Nur-Sultan qalasynda Eýrazııa ekonomıkalyq odaǵynyń mereı­toılyq sammıti ótedi. Qazaqstan Respýb­lı­kasynyń Prezıdenti retinde eýra­zııalyq ıntegrasııanyń damýyna barynsha jaǵdaı jasaımyn. Bizdiń memleketterimizdiń parlamentteri osy úderisterge zor úles qosa alady dep oılaımyn, – dedi Qazaqstan Prezıdenti.

Valentına Matvıenko par­la­ment­ara­lyq qarym-qatynasty nyǵaıtýdyń mańyz­dy­lyǵyn aıtyp, osy sapar Qa­zaqstan men Reseıdiń strategııalyq se­riktestigine tyń serpin beretinine senim bildirdi.

 – Kesteńizdiń tyǵyzdyǵyna qara­mas­tan, Federasııa Keńesine kelýge ýaqyt tap­qanyńyz úshin rızashylyǵymdy bil­diremin. Ekijaqty parlamenttik ózara is-qımyldardy jáne TMD Parla­ment­aralyq Assambleıa aıasyndaǵy ynty­maqtastyqty damytýǵa qosqan jeke úle­sińiz úshin Sizge alǵys aıtqym keledi, – dedi Valentına Matvıenko.

Sońynda Valentına Matvıenko Qa­sym-Jomart Toqaevqa bıylǵy sáýir aıynda Parlamentaralyq Assambleıanyń kezekti otyrysy josparlanǵanyn jáne osy jıynǵa Qazaqstan Respýblıkasy Parlamenti Senatynyń Tóraǵasy Darıǵa Nazarbaevanyń shaqyrylǵany týraly aıtty.

Kezdesý sońynda taraptar ekijaqty yntymaqtastyqtyń aýqymdy máseleleri jóninde pikir almasty.

Qazaqstan Respýblıkasynyń Pre­zı­denti Qasym-Jomart Toqaev Re­seı Federasııasy Federaldyq Jına­lysy Federasııa Keńesiniń tóraıymy Valentına Matvıenkomen kezdespes bu­ryn Belgisiz jaýynger beıitine gúl shoǵyn qoıý rásimine qatysty.

Qazaqstan Prezıdenti Belgisiz jaýynger beıitiniń janyndaǵy Máńgilik alaýǵa gúl shoǵyn qoıyp, Uly Otan soǵysynda qaza tapqan batyrlardyń rýhyna taǵzym etti. Rásim sońynda Memleket basshysy Qurmet qaraýylynyń sap túzep ótken saltanatty marshyn kórdi.

Aleksandr baǵyndaǵy Máskeý Kremliniń qabyrǵasyn boılaı orna­las­qan «Belgisiz jaýynger beıiti» Memo­rıaldyq sáýlet kesheni Máskeý úshin soǵysqan jaýyngerlerdiń qurmetine 1967 jyly salyndy. Keshenge Reseı mádenı murasynyń nysany, sondaı-aq Jalpyulttyq áskerı dańq memorıaly mártebesi berilgen.

Reseıge sapary qarsańynda Qazaqstan Prezıdenti Qasym-Jomart Toqaev «Ros­sııskaıa gazeta» basylymyna suhbat bergen bolatyn. Onda Memleket basshysy eki el arasyn­daǵy qarym-qatynas búgingi jahan­dyq qaltarystar kezeńindegi memle­ket­aralyq baılanystardyń etalonyna aınalǵanyn aıtqan edi. Qazaq­stan men Reseı arasyndaǵy odaqtastyq pen strategııalyq áriptestikti nyǵaıtý taqy­ryby kezdesýdegi negizgi basymdyq bere­tin baǵyt ekenin de jetkizdi. Sonymen qatar suhbatynda Qazaqstannyń Ujym­dyq qaýipsizdik týraly shart uıymynyń senimdi odaqtasy ekenin, memleketter arasyn­daǵy ózara is-qımyldy tereńdetý úshin, onyń ishinde saýda-ekonomıkalyq, ınves­tısııalyq, ǵylymı-tehnıkalyq, mádenı-gýmanıtarlyq yntymaqtastyq máseleleri boıynsha úlken áleýet baryna da nazar aýdarǵan bolatyn. Bul rette Qazaqstan Prezıdenti ejelgi dostyqtyń týy jelbirep, Reseı burynǵysha Qa­zaq­stannyń jetekshi saýda seriktesi bolyp qala beretinin, bul negizde eki el ara­syndaǵy taýar aınalymynyń jyl saıyn artyp keletinin, byltyr bul kórsetkish 17,6 mıllıard dollardy quraǵanyn aıtady. Elimizdegi árbir sheteldik úshinshi kásiporyn – reseılik bolsa, olardyń jalpy sany 9 myńnan asatynyn da mysalǵa keltirdi.

Qazaqstan Prezıdenti qazirgi ýa­qyt­ta álemde oryn alyp jatqan shynaıy kórinisterdi bylaı sıpattaıdy. Ja­handyq jáne óńirlik qaýipsizdik, shıe­lenisken geosaıası qaqtyǵystar men sanksııalar legi, kóshi-qon máse­lesi, halyqaralyq qatynastardaǵy daǵ­darystyq qubylystar, oqshaýlaný jáne proteksıonızm úrdisteriniń artýy, álemdik ekonomıkalyq ósimniń báseńdeýi, qarjy jáne valıýta naryq­taryndaǵy turaqsyzdyq, álemdik saý­dadaǵy ahýaldyń qubylmalylyǵy – damýshy, damyǵan elderge salqynyn tıgiz­beı qoımaıdy. Qasym-Jomart Toqaev jahandyq aýmaly-tókpeli kezeń­ge qaramastan Qazaqstan Eýrazııalyq keńis­tikte jáne keń aýqymda ıntegrasııalyq prosesterdi dáıekti túrde qoldaıtynyn tilge tıek etti. Qazaqstan Batys pen Reseı qarym-qatynasynyń jaqsaratynynan úmitti. Sonymen qatar Eýrazııalyq eko­no­mıkalyq odaqqa múshe barlyq memle­ketter úshin de shıelenistiń tarqaýy tıim­di bolmaq. О́ıtkeni aldymen Úlken Eý­razııanyń ekonomıkalyq áleýeti ar­tady. Azııa men Eýropanyń saýda-sat­tyq baılanysyn jandandyrýǵa negiz bolatyn Úlken Eýrazııanyń ke­le­shegine senim bar. Prezıdent óz sózin­de Shanhaı yn­tymaqtastyq uıymy ǵalam­shar hal­qy­nyń 45 paıyzyn, Eýrazııa aýma­ǵynyń 60 paıyzyn, álemdik ekono­mıkanyń úshten birin biriktirip otyrǵa­nyn mysalǵa alǵan.

Sondaı-aq Eýrazııadaǵy beıbitshilikti, turaqtylyqty, qaýipsizdikti qamtamasyz etýdiń mańyzdy faktory qurlyqtaǵy memleketterdiń birlesken is-áreketteri negizinde júzege asatynyn aıtady. «Bizdiń elderimiz kópjaqty halyqaralyq jáne óńiraralyq alańdarda tyǵyz ózara is-qımyl jasaıdy jáne óz kúsh-jigerin úılestiredi. Qazaqstan Prezıdenti EAEO qurylymdary búginde Eýrazııalyq keńistiktegi ıntegrasııalyq prosesterdiń qozǵaýshy kúshi ekenin jetkizedi.