Eldegi Atom energııasy jónindegi agenttik tóraǵasy Almasadam Sátqalıev bastaǵan delegasııa Fransııaǵa jumys sapary aıasynda Parıjde memlekettik organdar men fransýz atom salasyndaǵy jetekshi kompanııalar ókilderimen birqatar kezdesý ótkizdi, dep jazady Egemen.kz.
EDF, Framatome men Orano kompanııalarynyń basshylyǵymen ótken kelissózder barysynda bizdiń eldegi atom-energetıkalyq jobalardy iske asyrýǵa fransýz kompanııalarynyń qatysý múmkindikteri, sondaı-aq yntymaqtastyqtyń perspektıvalary ekonomıkalyq tıimdilik pen uzaq merzimdi turaqtylyq turǵysynan talqylandy.
Fransııanyń ıadrolyq retteý organy – ASNR basshylyǵymen kezdesýde atom salasyn memlekettik retteý, ıadrolyq ári radıasııalyq qaýipsizdikti qamtamasyz etý, sondaı-aq AEHA usynymdary men halyqaralyq standarttarǵa sáıkes tájirıbe almasý máseleleri qaraldy. Taraptar retteýshi organdardyń ınstıtýsıonaldyq táýelsizdiginiń mańyzdylyǵyn atap ótip, saraptamalyq yntymaqtastyqty damytýǵa daıyn ekenderin bildirdi.
Atom energetıkasyn qaýipsiz damytýdyń joldary qandaı?
Kadrlyq áleýetti damytý máselelerine erekshe nazar aýdaryldy. I2EN atqarýshy dırektorymen ótken kezdesýde elimizdiń azamattyq ıadrolyq energetıka salasyna arnalǵan mamandardy daıarlaý tásilderi talqylandy. Fransýz tarapy kadrlyq áleýetti damytýǵa baǵyttalǵan qoldaý baǵdarlamasynyń aldyn ala tujyrymdamasyn usynyp, taraptar kadr daıarlaý jónindegi jol kartasyn birlesip ázirleý týraly ýaǵdalasty.
Buǵan qosa Fransııa Respýblıkasynyń Eýropa jáne syrtqy ister mınıstrligi, sondaı-aq ekonomıka, qarjy, ónerkásip, energetıka men sıfrlyq egemendik mınıstrligi ókilderimen kezdesýler ótkizilip, ekijaqty ekonomıkalyq ári ınvestısııalyq yntymaqtastyqty keńeıtý men ónerkásiptik kooperasııa máseleleri basty taqyrypqa aınaldy.
Parıj qalasynda ótken kezdesýler Qazaqstan men Fransııanyń atom energetıkasy salasyndaǵy strategııalyq áriptestikti tereńdetýge ári birlesken jobalardy iske asyrýǵa ózara múddeliligin rastady.