Qazgıdromet sınoptıkteri 4 aqpanda elimizdiń basym bóliginde aýa raıy kúrt qubylatynyn boljady, dep habarlaıdy Egemen.kz.
Sınoptıkterdiń boljamyna sáıkes, Túrkistan oblysynyń batysy, soltústigi, ońtústigi jáne taýly aýdandarynda tuman túsip, ońtústik-shyǵystan soqqan jeldiń ekpini taý asýlarynda túnde, al kúndiz keıbir aýdandarda sekýndyna 15-20 metrge deıin jetedi.
Qaraǵandy oblysynda batys, soltústik jáne shyǵys bólikterinde tuman kútiledi. Qaraǵandy qalasynyń ózinde túngi jáne tańǵy ýaqytta kóriný qashyqtyǵy tómendeıdi.Ulytaý oblysynyń soltústigi, ortalyǵy men ońtústiginde de tuman basym. Jeldiń kúsheıýi ásirese oblystyń soltústigi men shyǵysynda baıqalady. Jezqazǵan qalasynda da tuman bolady.
Pavlodar oblysynyń soltústik jáne shyǵys aımaqtarynda tuman túsedi.
Soltústik Qazaqstan oblysynda qar jaýyp, burqasyn soǵady. Túnde jáne tańerteń tuman kútiledi, al jeldiń ekpini kúndiz keı jerlerde sekýndyna 15-20 metrge deıin kúsheıedi. Petropavl qalasynda da qatty jel men kóktaıǵaq bolýy múmkin. Sonymen qatar, 5 aqpanda óńirde jańbyr men qar aralas jaýyn-shashyn, burqasyn jáne kóktaıǵaq boljanyp otyr.
Aqtóbe oblysynda túnde qatty qar, kúndiz jańbyr men qar aralas jaýyn-shashyn jaýady. Kóktaıǵaq pen tuman ásirese ortalyq, ońtústik jáne shyǵys bólikterde kútiledi.Atyraý oblysynyń soltústigi men shyǵysynda azdaǵan qar men jaıaý burqasyn bolady. Oblystyń birneshe aýdanynda tuman men kóktaıǵaq saqtalyp, jel ekpini sekýndyna 15-20 metrge jetýi múmkin.
Abaı oblysynda qar jaýyp, burqasyn soǵady. Soltústik, ońtústik jáne shyǵys aýdandarda tuman túsedi.
Shyǵys Qazaqstan oblysynda da qar men burqasyn kútiledi, al keı aımaqtarda jel ekpini sekýndyna 20 metrge deıin jetedi.