Memleket óz Konstıtýsııasy mátinine halyqaralyq quqyqtyń negizgi qaǵıdattaryn, jalpyadamzattyq qundylyqtardy jáne halyqaralyq qujattarda bekitilgen adam quqyqtary men bostandyqtaryn engizedi. Bul týraly Konstıtýsııalyq reforma jónindegi komıssııanyń kezekti otyrysynda Májilis depýtaty, zań ǵylymdarynyń doktory Únzıla Shapaq aıtty, dep habarlaıdy Egemen.kz.
Onyń túsindirýinshe, halyqaralyq quqyq pen ulttyq quqyqtyń araqatynasy ústemdik pen baǵynyshtylyqqa emes, ózara árekettesý, tolyqtyrý jáne úılestirý qaǵıdattaryna negizdeledi. Osyǵan oraı, usynylyp otyrǵan Konstıtýsııa jobasynda halyqaralyq sharttarǵa qatysty negizgi erejeler kózdeldi.
«Osylaısha, 5-baptyń 1-tarmaǵy týraly qysqasha tujyrymdap aıtsam, Qazaqstan Respýblıkasy halyqaralyq mindettemelerden bas tartpaıdy, kerisinshe ony qoldanylatyn quqyqtyń, ıaǵnı qoǵamdyq qatynastardy retteıtin mańyzdy quramdas bóligi retinde moıyndaıdy», dep naqtylap ótti depýtat.
Elvıra Azımova: Konstıtýsııa strategııalyq qaǵıdattardy bekitedi
Iаǵnı, Ata zań jobasynda halyqaralyq sharttardyń el aýmaǵynda qoldaný mehanızmi – zańdarmen belgilenetini qarastyrylǵan. Bul turǵyda kózdiń qarashyǵyndaı qorǵalatyn ulttyq memlekettik egemendikti tikeleı nemese janama túrde shekteýge ne álsiretýge jol bermeý – negizgi mindetterdiń biri.
«Iаǵnı, biz halyqaralyq mindettemelerdi qoldanystaǵy quqyqtyń bóligi retinde tanımyz, olardy zań talaptaryna sáıkes qoldanamyz jáne olardy jarııalaımyz, óıtkeni olar qoǵamdyq qatynastar sýbektileri úshin mindetti júris-turys erejelerin belgileıdi», dep túsindirdi zańger.