- Bıylǵy qys Batys Qazaqstan oblysy turǵyndary úshin úlken synaq boldy. Sońǵy 30 jyldan beri bolmaǵan qar jaýdy. Aýa raıyn baqylaýshy mamandardyń aıtýynsha, mundaı qalyń qar sońǵy ret 1987 jyly tirkelgen eken. Ol jyly qar qalyńdyǵy 54 santımetr bolsa, bıylǵy qar 60 santımetrden asty. Osyndaı jaǵdaıda sizder aýa-raıynyń qolaısyzdyǵyna qaramaı, ýaqytpen sanaspaı úlken qyzmet atqardyńyzdar. Sonymen qatar oblystaǵy jol, qurylys kompanııalary men jeke kásipkerler de bizge kómek qolyn sozdy. Osyndaı uıymshyldyqtyń arqasynda tabıǵattyń tosyn minezine tótep berdik. Aldaǵy ýaqytta da halyq úshin jasalatyn ıgi isterdi birlesip atqaramyz dep senemin, - dedi Altaı Kólginov.
Aıta keteıik, 2017-2018 jylǵy qys maýsymynda Oral qalasy aýmaǵynan 200 myń sharshymetr qar shyǵarylǵan eken. Al bıylǵy qysta shahar aýmaǵynan tazartylyp alynǵan qardyń kólemi 1,5 mln sharshymetrden asyp ketti. byltyr qar tógetin 2 polıgon bolsa, bıyl osyndaı 7 alań aýzy-murnynan shyqqan.
«Jaıyq Taza qala», «Oral Taza Servıs», «Batys sý arnasy» JShS-lary men «Jaıyqjylýqýat» AQ birlese atsalysqan jumystyń nátıjesinde Oral qalasynda bir de bir úı sýǵa ketpedi. «Jaıyq Taza qala» JShS dırektory Qýat Ersaıynnyń aıtýynsha, kóktemgi qar sýy jınalǵan jerlerden 53 myń sharshymetr sý sorylyp, aýlaqqa tógilgen. Atalǵan mekemede búginde 750 adam eńbek etedi, 300 tehnıka jumys istep júr. Al jalpy kóktemgi sý tasqynynyń aldyn alýǵa Oral qalasynda 1 myńnan asa adam jumylǵan bolatyn.
О́ńir basshysynyń alǵys hatyn alǵan «Jaıyq Taza qala» mekemesiniń bir top qyzmetkeri men mekeme-kásiporyn basshylary da qarapaıym qar tazalaýshylarynyń eńbegi elengenine rızashylyq bildirdi.
Sýretti túsirgen Rafhat HALELOV
Batys Qazaqstan oblysy